من قصص السفر المميزه معانا لماليزيا وتايلاند 

قصة سفر Karim Gamal

رحلتي باختصار كانت حركة مجنونة شويتين
بما اني بعشق الطبيعة والمساحات الواسعة وعندي شغف رهييب بدول شرق اسيا تحديدا بعيدا عن الاتحاد الأوروبي ومشاكل الفيزا
فقعدت ادور على النت ايه المناسب بالنسبالي كـ تكلفة وفي نفس الوقت اتبسط
كنت محتار ما بين (ماليزيا - تايلاند - كمبوديا - فيتنام - اندونيسيا)
بعد ما قرأت وبحثت كتير استقريت على ( ماليزيا - تايلاند )
اهم ما في الرحلة انا شايفه التخطيط لكل التفاصيل
بدأت اخطط قبل الرحلة بـ شهرين تقريبا
كنت بكتب كل حاجه ممكن تيجي في دماغي
ناخدها نقطة نقطة
اولا: الطيران 
كنت بدور في مواقع كتييير واهمهم Kayak و Sky scanner و Flyin و Flapp
ومواقع شركات الطيران نفسها على أنسب رحلة من حيث الوقت والتكلفة , قعدت تقريبا اسبوع بتابع تدرج الاسعار لغاية ما لقيت رحلة Special Offer من الطيران العماني Multi Station ترانزيت مسقط بقيمة 510$ تقريبا واللي سافر قبل كده هناك يعرف ان السعر ده قليل جداا ! على بعد المسافة بين مصر وماليزيا وتايلاند
Cairo >> Muscat ( Oman )
Muscat ( Oman ) >> Kuala lampur ( Malasyia )
Bangkok ( Thailand ) >> Muscat ( Oman )
Muscat ( Oman ) >> Cairo

والرحلة بين البلدين على خطوط Air_Asia " الطيران الماليزي" one way بقيمة 26$ (طيران لطيف )
Kualalampur ( Malasyia ) >> Bangkok ( Thailand )
الجميل في الموضوع ان شركات الطيران المحترمة بتعمل ايه بقى 
لو عندك رحلة ترانزيت ( اكتر من 6 ساعات ) بيوفرو ليك اوضة في فندق 5 نجوم مع اوبن بوفيه مجانا !! لغاية ما رحلتك التانية تيجي وكمان لو عند فيزا بلاتينيوم ( تقدر تخش بيها VIP Lounge Hall ) ومعاك اوبن بوفيه بردو و نت مجانا 
خلاصة فكرة حجز الطيران
انك تدور كتييير ومتزهقش ويكون قبل الرحلة بفترة كافية
ثانيا: الاقامة
ارخص حاجة ممكن تتخيلها لو فكرت فيها صح وبعدت عن المألوف
كنت بدور ما بين Couchsurfing ومابين Hostels
لغاية ما استقريت على Hostel صيني في " كوالالامبور " ماليزيا اوضة private بحمامها الخاص بـ 8$ في الليلة وخدماتهم ممتازة جداا... وفي ارخض لو هتحجز Dorm ( عنبر بمعنى اصح )
ونفس الكلام بالنسبة لـ تايلاند وتقريبا نفس السعر
فيه موااقع كتيير لحجز Hostels واشهرهم 
وبالنسبة لـ Couchsurfing ده الويب
ثالثا: الفيزا 
- ماليزيا : ملهاش تأشيرة للمصريين .. بمجرد نزولك من الطيارة تخلص اجراءاتك وختم الدخول وهوب تلاقي نفسك جوا البلد
- تايلاند : تاشيرتها ليها شوية طلبات زي اي تاشيرة هتلاقوها بالتفصيل في الموقع هنــــا
رابعا: البرنامج السياحي " Attractions "
- بما اني طالع مع نفسي من غير اي شركة سياحية فـ بحثت على النت على افضل الاماكن السياحية اللي اروحها سواء في ماليزيا او تايلاند بحيث اني استغل كل ساعة هقضيها ..
في حاجات عرفتها من Blogs كتيير على النت وصفحات على FaceBook وكمان Applications على الموبايل زي Visitacity ده بالنسبالي كان رائع ..فكرته باختصار انه بيعملك برنامج سياحي للمدينة اللي انت عايز تزورها خلال مدة اقامتك شامل كل تفاصيل الاماكن من المواعيد والتكلفة وازاي تروح المكان ... كل حاجة ممكن تتخيلها وتقدر تشغله offline لو حابين تجربوا ده الويب 
- كنت بسستخدم ابلكيشن خرايط Here الخاص بشركة نوكيا والميزة اللي فيه اني كنت بنزل الـ Database للخرايط بتاعة البلدين كلها مرة واحدة واقدر اشغله Offline هناك واعمل Save لكل مكان هروحه على الـ Map من قبل ما اسافر اصلا
غير انه Application سهل جدااا مقارنة بـ اي Map Applications تانية
* ماليزيا 
دولة منظمة جدااا في كل حاجة وتحديدا كوالالمبور ( العاصمة )
العملة : الرنجت ( الدولار = 4.10 رنجت تقريبا ) مكاتب تحويل العملة هتلاقيها في كل مكان
الاكل : مفيهوش اي مشكلة طالما علامة الجودة ( حلال ) موجودة في المطعم .. غير كده الواحد يقلق وفي نفس الوقت رخيص مش غالي
التنقل : اسهل حاجة هناك المترو ( 7 خطوط ) رابط كوالالامبور كلها .. تقدر تروح عن طريقها اي مكان انت عايزه وفي نفس الوقت مش غالي
* تايلاند
العملة : بات ( الدولار = 35 بات )
الاكل : اغلي من ماليزيا شويتين... ودايما اسال في اي مطعم تخشه على ( الاكل الحلال ) لاني قابلتني مشكلة كبيرة في الموضوع ( كنت بعاني بصراحة )
التنقل : المنتشر جدااا في الشوارع هناك ( التوكتوك طبعا ) اكتر من العربيات 
بما اني كنت قاعد في بانكوك ( العاصمة ) بعيدا عن الجزر فـ انا هتكلم عنها
اولا: هي بلد اصلا بتصحي بالليل عكس ماليزيا
ثانيا: في البيع والشرا هناك خد راحتك اوي ( اووووووي ) في الفصال عالم حرامية جداا
ثالثا: اللي بيتكلم انجليزي هناك هتلاقي بلهجة شوية تايلاندية فـ خد بالك لو بتتعامل بالفلوس والنطق بتاع الارقام يستحسن توضح الارقام عن طريق الايد مثلا ( forty - forteen ) من النطق بتاعهم مش هتعرف تميزهم فـ تستخدم صوابع ايدك عشان تاكد على الرقم 
رابعا: الجو خد بالك قبل ما تحدد معاد سفرك ... افتح مواقع الطقس وشوف درجة الحرارة هتبقى عاملة ازاي في الوقت ده ... لان فيه شهور من السنة جو تايلاند رطووووبة عالية جدااا الصبح وبالليل امطار وبرق ورعد
خامسا: التصوير 
لو انت هاوي وليك في التصوير ... انصحك بـ الكاميرات الـ Action سهلة وحجمها صغير وصورها حلوة جدااا زي GoPro تقدرتشتريها او تأجرها

#قصتى_مع_سافر

شكرا ليك يا كريم على مشاركتك قصتك الجميله معانا