كيفية استخراج تصريح السفر من الجيش


تصريح السفر من الجيش للمصريين - خطوة بخطوة

يطلب من اي شاب مصري خدم بالقوات المسلحة و ما زال على قيد قوات الاحتياط, ان يقدم تصريح/اذن من القوات المسلحة بالسفر للخارج يثبت انه ليس قيد الاستدعاء او يوجد مانع معين من ذهابه للبلد اللي عايز يسافرها, ولن يستطيع ان يغادر الجوازات دون وجود هذا التصريح.

هي ده الخطوات اللي هتمر عليها لاستخراج تصريح السفر:
ملحوظة: هذه الخطوات فقط للشباب اللي أدى الخدمة بالفعل وعلى ذمة قوات الاحتياط, ومدونة من واقع تجربة شخصية مباشرة تمت في شهر أكتوبر 2013, ويحتمل حدوث بعض التجديدات في الخطوات فيما يلي هذا التاريخ.

1- تستطيع من خلال مركز خدمة المواطنين الموجود في الزيتون (تحت كوبري التجنيد-الميدان التالي لميدان المحكمة مصر الجديدة) الانتهاء من اصدار التصريح بالكامل بطريقة سريعة ومنظمة وسهلة نسبيا ولا تحتاج ان تذهب الى مكان اخر ان كانت حالتك طبيعية.

2- مواعيد العمل: من السبت الى الخميس, من الساعة 7صباحا وحتى الساعة 2ظهرا, يتم فتح المكتب يوم الجمعة او مساءا في حالة الطوارئ فقط, عندما يكون موعد السفر بعد أقل من 24 ساعة فقط.

3- تجيب معاك ايه: 1- صورة البطاقة او صورة الباسبور (الأصول مش هتخسر كاحتياطي), 2-شهادة انهاء الخدمة العسكرية أو صورة طبق الأصل منها مختومه من محل العمل, 3-قلم جاف, 4-فلوس حوالي 20 جنيه (50 احتياطي) وتعمل حسابك هتقعد ساعتين مثلا.

4- هتدخل من البوابة, تذكر انك هتحتاج تسيب بطارية الموبايل على البوابة, لو قلقان سبها قبل ما تيجي, بس متقلقش مش هتضيع هتاخدها تاني في اخر اليوم, وتروح على مبنى خدمة المواطنين.

5- تدخل على مكتب الاستعلامات على اليمين, وتقول للعسكري اللى على المكتب, انك عايز تعمل تصريح سفر, هيشوف شهادة الجيش ويديك ورقة ويقولك تروح لأول شباك بعد ما تملاها.

6- هتقعد وتملأ بياناتك من شهادة انهاء الخدمة, اسمك ورقمك العسكري وبعض البيانات العادية.

7- هتروح لأول شباك وتسيب ورقك ( صورة البطاقة/ الباسبور – شهادة الجيش/ صورتها – الورقة اللي ملتها).

8- هتنتظر, لمدة قد تصل الى ساعة, لحد ما يندهوا اسمك في الميكروفون.

9- لما تروح هناك هيدوك ورق و رقم.

10- بعدين تنتظر كمان نصف ساعة, بتشوف اول ما يظهر رقمك ويتنده عليه ,تروح تدفع فلوس وتاخد وصل بيها وتستلم ورق تاني تملاه.

11- هتملا الورق الجديد زي اللي ملتها في الاول وبتوضح البلد اللي هستافرلها ومدة التصريح اللي انت عايزها (على اساس بقيلك كام يوم قبل ما تسافر- غالبا اعملها شهر مثلا).

12-بتروح اخر شباك تسلمه الورق بعد ما تكون مليته وبتنتظر التصريح يطلع.

13- خلال نصف ساعة المفروض هيندهوا اسمك وتأخد التصريح وتديهم الوصل اللي انت مرمتهوش لسه.

14- تأكد من أسمك كويس عليه والمدة المصرح السفر فيها وجهة السفر.

15- متنساش تأخد بطارية الموبايل بتاعك, وترجع بالسلامة.

كيف تستخرج صحيفة الحالة الجنائية خلال ساعة

عناوين مكاتب تصديق وزارة الخارجية المصرية

سافر أوروبا سفر سياحة تعليم الدراسة تصريح سفر ألجيش فيزا مصر مطار