قصة إبراهيم فى الصعود للكليمنجارو


قصة إبراهيم فى الصعود للكليمنجارو

قصة رقم 18 ( Ebrahim El Cc)

بسم الله الرحمن الرحيم

رحله البحث عن الذات

حبيت انهارده اشاركم قصتى مع السفر..عكس اغلب الناس انا رحلتى ماكنتش لاوروبا ولا لامريكا..رحلتى كانت لتنزانيا والهدف من الرحله كان تسلق جبل كليمنجارو اعلى جبل فى افريقيا واعلى  free standing mountain فى العالم .

مرحله القرار.

رحلتى بدأت بالصدفه البحته..كنت قاعد عند واحد صاحبى فى مكتبه ولقيت مجله بتاعت شركه سياحه على المكتب فقولت اقلب فيها لقيت شركه عامله رحلات لكينيا فقولت بينى وبين نفسى كينيا ايه اللى حد يروح يسيح فيها..المهم بدات اتفرج ع الصور شدنى الموضوع جدا خصوصا انى حسيت انى بحب الطبيعه والجبال و  Hikingاكتر من اى حاجه تانيه. فبدأت ادور ايه اللى ممكن ممكن يتعمل فى كينيا طبعا غير المحميات الطبيعيه ومشاهده الحيوانات لقيت ان فيه جبل هناك اسمه Mt. Kenya  ده تانى اعلى جبل فى افريقيا والناس بتتسلقه فقولت تمام يبقى نروح نتسلق الجبل ده. ورجعت قولت لنفسى ماللى يتسلق تانى اعلى جبل فى افريقيا يتسلق اعلى جبل وخلاص. طب فيني يا عم اعلى جبل. قالك اطلع على تنزانيا هتلاقى هناك جبل اسمه كليمنجارو على الحدود بين كينيا وتنزانيا.

مرحله التجهيز.

فتره التجهيز دى اخدت منى تقريبا سنه كامله. طبعا بدأت اقرأ كل المقالات اللى مكتوبه عن رحله التسلق لكليمنجارو وان الرحله بتتراوح من 5 ايام ل 8 ايام عشان توصل لاعلى نقطه ف افريقيا Uhuru preak  ودى ارتفاعها 5895  متر عن سطح البحر. بدأت اول حاجه اشوف المعاد المناسب لتسلق الجبل واخترت انى اتسلق الجبل ده فى الاسبوع الثانى من شهر يناير 2014 عشان مايبقاش فيه مطر وتبقى الليله اللى هنوصل فيها للقمه ليله مقمره القمر فيها بدر. بعد اختيار المعاد كان لازم اختار الشركه اللى هطلع معاها. راسلت شركات كتييييير جدا وسألت على كل التفاصيل اللى محتاجها وفى الاخر وقع اختيارى على شركه اسمها zara tours  وكان اختيار موفق الصراحه. الحاجه التالته اللى كانت مهمه جدا هى اختيار الطريق اللى هنوصل منه لاعلى نقطه للجبل. انا اخترت lemosho route  ده بيبقى 7 ايام فبيسمح للجسم انه يتعود على نقص الاكسجين فى الدم بسبب الارتفاع العالى. الحاجه الرابعه بدأت اكتب كل الحاجات اللى هحتاجها معايا فى الطالعه دى خصوصا انها بتحتاج معدات ولبس خاص والتطعيمات اللى لازم اخدها. خامس حاجه ودى اهم حاجه الاستعداد الذهنى والبدنى بدأت اتدرب فى الجم على تمارين الكارديو عشان الواحد يبقى عنده لياقه بدنيه خصوصا مع نقص الاكسجين. وعلى شهر اغسطس 2013 حسيت انى جاهز للرحله وحجزت تزاكر الطيران. طبعا حوار الفيز والورقيات ده امر مفروغ منه.

رحله البحث عن الذات 

من اولها كده تأخير 5 ساعات فى المطار بسبب وجود ضباب واستحاله هبوط او نزول اى طياره. دى كانت اول حاجه فى الرحله كلها وانا لسه فى المطار. انا المفروض كنت هسافر من مطار الكويت لمطار اديس ابابا فى اثيوبيا ومن اثيوبيا هاخد طياره تانيه لكليمنجارو فى تنزانيا فطبعا مع تاخير الطياره 5 ساعات اكيد مش هلحق الطياره التانيه وبالتالى مش هلحق الجروب اللى طالع. بعت ايميلات للناس انى مزنوق فى المطار ومش عارف هوصل امتى.المهم وصلت اثيوبيا حوالى الساعه 1 الضهر  بالسلامه وطبعا فاتتنى الطياره التنانيه.طيب امتى الطياره اللى بعدها قالولى الساعه 1 بليل المهم اخدنا الطياره التاينه الساعه 1 بليل وهى كانت عباره عن اتوبيس بجناحات وماطلعناش على تنزانيا على طول داحنا فوتنا الاول على مومباسا فى كينيا حملنا شويه ركاب وبعدين وصلنا تنزانيا تقريبا الساعه 4 الصبح بعد تقريا اكتر من 24 ساعه فى المطارات من غير نوم. طبعا فى الفتره دى بعت ايميل للناس هناك فى كليمنجارو عشان يستنونى فى المطار وقولتلهم انا مش عايز اى حاجه تتأخر انا هبقى جاهز انى اتحرك 7 الصبح فى المعاد 

طبعا وصلت ملحقتش انام حضرت شنطتى اللى هاخدها معايا على ضهر وحطيت فيها الحاجات المهمه بس وسيبت ال sleep bag  و باقى الحاجات فى الشنطه اللى هيشلها الشيالين. اتحركنا من الفندق ف moshi  ووصلنا ل Londorossi Gate ودى تعتبر البدايه الفعليه للرحله وهناك بتخلص شويه ورقيات وبتاخد التصاريح اللازمه ومشينا حوالى 5 ساعات فى وسط الغابات الاستوائيه وقضينا اول ليله فى Forest camp   وده كان على ارتفاع حوالى 2700 متر. طبعا مافيش حاجه اسمها حمامات بقى او دش سخن او الرفاهيه الموجوده فى حياتنا الطبيعيه وده كان جزء من التجربه واحلى جزء ف التجربه وخلال الاربع الايام اللى قبل ال summit day كنا كل يوم بنمشى حوالى 5 ل 7 ساعات ونبات فى الكامب ونكمل تانى يوم الصبح. المناظر الطبيعيه طبعا مالهاش حل.تحس كده بهدوء داخلى وطبعا كانت بتتغير بتغير الارتفاع من غابات لصحارى لاراضى منبسطه بالسافانا. وانت ماشى ممكن تتكلم مع اى حد سواء انت تعرفه او متعرفوش فى اى حاجه من كل الجنسيات بيجمعكم نفس الهدف ونفس الميول.فعلا الكنز كان فى الرحله نفسها.وصلنا خلاص ل Barafu Camp وده عباره عن ال base camp  او الكامب اللى هنتحرك منه للوصول للقمه وده كان على ارتقاع 4600 متر تقريبا. طبعا انا اكتشفت ان عدوك الاول فى الرحله دى هو الارتفاع ونقص الاكسجين. ريحنا شويه واتغشينا وبعدين على الساعه 11 ونص بليل ابتدينا نتحرك من ال base camp  ف رحله استمرت حوالى 7 ساعات متصله بتتحرك على منحدر طالع لفوق مع البرد ونقص الاكسجين. كانت اصعب ليله قضيتها فى حياتى.عدت عليا فتره بدأت اعيط عشان فعلا مش قادر اكمل خلاص بدأت احس ان جسمى مش قادر يتعامل مع نقص االاكسجين الفظيع ( تقريبا كنت بمشى وانا نايم) بس الجايد اللى معايا كان بيقولى انا عارف انك هتقدرتوصل وبدأ يشدنى ويزقنى فعلا عشان اكمل الطريق. بعد حوالى 6 ساعات وصلنا ل نقطه اسمها Stella Point وده بالنسبالى كان معناه ان لسه ساعه بس واوصل لحلم حياتى فى اخر سنه من عمرى وقتها لاعلى نقطه فى افريقيا. ساعتها انا حسيت خلاص انى مش تعبان وانى قادر فعلا انى اكمل. بعدها بساعه فعلا وصلت لهدفى    Uhuru peak يوم الخميس16 يناير 2014 حوالى 7 الصبح وصلت اعلى نقطه فى افريقيا على ارتفاع 5895 متر عن سطح الارض وشوفت اروع  مشهد لشروق الشمس فى حياتى وكانت اول مره اعرف معنى لدموع الفرح.

. لغايه دلوقتى حاسس ان ده احلى حاجه عملتها فى حياتى كلها واسعد لحظه ليا فى حياتى اللى لو اخترت مابينها وبين اى حاجه تانيه كنت هختار انى اتسلق الجبل ده. عرفت يعنى ايه تحلم بحاجه وتسعى ليها وتخططلها وتحققها. عرفت كمان ان الانسان مايعرفش الطاقه اللى جواه قد ايه الا لو خرج من ال comfort Zone  بتاعته. 

اسف انى طولت عليكو بس انا اختصرت حاجات كتير اوى. اى حد عايز يعرف التفاصيل يحضر ايه وايه المطلوب منه واليوم بيبقى ماشى ازاى فى الجبل والفيزا وحجوزات الطيران والتطعيمات ومعلومات عن الجبل نفسه والطرق المختلفه للتسلق  يقول بس وانا هرد على كل اسألتو. 

 من مسابقة #قصتي_مع_السفر

سافر قصص قصص السفر تنزانيا السفر لتنزانيا قصص السفر لتنزانيا تسلق الجبل جبل الكلمنجارو قمة أفريقيا للكليمنجارو