20 نصيحة من مؤسس شركة سافر


النهارده عدت سنة على افتتاح مقر شركة سافر   12 - 11 - 2015 
وبالمناسبة دي مؤسس سافر هيشاركنا بـ 20 نصيحة من خبراته 

 
1- اوعي تشتغل حاجه مبتحبهاش حتي لو هتقبض كتير (صدقني مفيش فلوس بتقعد حتي لو بتقبض مليون جنيه) متكنش ترس فى أله.
2- اتعلم لغة (إنجليزي - فرنسي - ألماني ...) هتفتح لنفسك أبواب جديدة ممكن تغير حياتك.
3- لو عايز فلوس روح الخليج وهتشتغل وهتعمل فلوس كتير بس على حساب عمرك وصحّتك وأهلك وصحابك (اختار)
4- لو هتشارك أي حد فى شغل اكتب عقد بكل اللى هتتفقوا عليه حتي لو هتشارك أخوك (اكتبوا العقد وانتو حبايب أحسن)
5- لو عندك فكرة وعايز تستثمر فيها ( خطط كويس جدا واستشير اصحاب الخبرات واكتب خطط بديلة وحط خطط قصيرة وخطط طويلة وفكر لـ 5 سنين قدام هتكون فين) فكّر ببساطة
6- لو بتفكر تتجوز اختار بنت الحلال اللى تصونك وتحبها وتحبك، ميغرّكش المظاهر (صدقني الجمال بيروح مع الأيام)
7- لو هتسافر تتعلم أو تشتغل فى أي بلد إعمل حسابك انك هتكون مسئول مسئولية كاملة عن نفسك (والغربة فعلا صعبة).
8- اوعي تعتمد على حد في حياتك (كلهم راحلون) انت بطل حياتك
9- لو مش حابب دراستك سيبها واعمل اللى بتحبه (اليوم اللى بيفوت ده من عمرك ومش هيرجع)
10- حط دايما فى بالك ان الفلوس دي مجرد ورق (اتعلم امتي ترميه وامتي تلعب بيه)
11- متبقاش على حد مش باقي عليك (بكره هتتعود غيابه وهتضحك على سذاجتك) ولو حاولت ترضي كل الناس اعرف انك فاشل.
12- فى البيزنس لتكون أسد لإما هتتركب.
13- اغلط وانت صغير واغلط كتير واتعلم (الغلطة وانت كبير واعرة) بس خليك واثق انك هتدفع تمن كل غلطة انت عملتها.
14- لو بتخاف من حاجه اعملها وبطّل تخاف.
15- أهلك هما بس اللى باقينلك وهما أكتر حد هيخاف عليك وخصوصا (أمك وأبوك) خد رضاهم ولو ميتين ربنا يرحمهم. 
16- لو بتشتغل فى مكان وهتسيبه حاول تسيب أثر كويس قبل متمشي (بكره ممكن تحتاجهم)
17- لو دخلت مع صحابك فى بيزنس اعمل حسابك انك هتقدم تنازلات كتير، ولو مش متفقين على كل كبيرة وصغيره وفي (عقد مكتوب بينكم) ممكن تخسروا بعض.
18- متعملش اكتر من حاجه فى نفس الوقت (اشتغل وركّز فى حاجه واحدة) هتنجح أسرع.
19- الحياة إما أن تكون مغامرة جريئة أو لاشيء.
20- تعاون مع المؤسسات الكبيرة وادخل معاهم فى تعاقدات واتفاقات واستفيد من خبراتهم ده هيخليك تنجح أسرع وبكره تبقي أحسن منهم وسافر
 
 النهارده عدّت سنة على افتتاح سافر
وخلال الفترة دي أخفقنا واتعلمنا كتير ونجحنا ولسه مستمرين ومكملين بيكم، كل سنة وانتو معانا 
 
تطوع الخلاصة نصائح تجربة سافر