قصتي مع السفر لألمانيا


قصتي مع السفر لألمانيا

تجربتي مع السفر لألمانيا ...
بعد الثورات المصرية الكتيرة اوي !!
اتصل بي اصدقاء ألمان كنت بعلمهم عربي اون وقالوا لي تعال عندنا روح عن نفسك شوية ... وإتفرج على بلدنا يمكن تحبها وتيجي تعيش فيها 
طبعا انا مصدقتش وقلت شكلهم بيشتغلوني وفكرت للحظة اه صحيح دول لما بيقولوا حاجة بيبقوا يقصدوها بجد ... مش عزومة مراكبية.
ففكرت في الموضوع بجد وقلت أكلم السفارة اشوف هيعوزوا ايه واخد ميعاد وكلمت السفارة يوم أتنين وقالولي اقرب ميعاد هيكون بعد يومين يعني الخميس وسألت على اقرب وقت غير الخميس قالوا لي بعد اسبوعين لأن كان في عيد وكده قلت لا خلاص خليها الخميس ومن تاني حفرت الأرض وخلصت الورق المطلوب ورحت السفارة الخميس من غير حاجة كدة في مجمع التحرير ولا وثيقة تأمين ربنا رزقني بواحد عملهالي في دقيقة جنب السفارة ووصفلي اجيب ايه من مجمع التحرير وجيت قبل ميعادي بربع ساعة وورقي كامل وسلمت لموظف السفارة الاوراق وشاف جواب التوصية بتاع الشركة اللي انا شغال فيها ودخلني جوه خلصت الاجراءات وبعتولي الباسبور بمدة عشرة ايام زي ماكنت طالب.
وصلني الباسبور بعد اسبوعين او اكتر مش فاكر وحجزت على فرانكفورت وسافرت واصحابي ربنا يخليهم لي كانوا بإنتظاري سافروا لي من Recklinghausen city اللي هي في ولاية North Rhine-Westphalia اللي عاصمتها Düsseldorf مسافة بتاع 250Km ساعتها وأنا في مطار القاهرة فضلت اتحايل عليهم واقل لهم اجيلهم بقطار وكدة قالولي انت ضيفنا ومينفعش نسيبك اول مرة كدة تلف لوحدك ولما وصلت طبعا كانوا في استقبالي بعد ساعة بيدوري علي 
ونزلنا فرانكفورت واتمشينا فيها شوية وبعدين مشينا رحنا Recklinghausen وفي الطريق مش فاكر وقفنا فين اكلنا حاجة تركي كدة زي الشورما مش فاكر اسمها ايه وروحنا بيتهم ونمت كان طبعا يوم كله نضيف يعني بتحسر على اللي احنا فيه.
تاني يوم بعدها نزلوا يعرفوني بأفراد عائلاتهم وزرت مدرسة يعمل بها أحد أفراد عائلتهم للأطفال المتأخرين تعليميا ( مش متخلفين ) طلبة عاوزين جهد أكتر من المدارس العادية وطبعا الترحيب بالقهوة والكيك اللى كل ماحد يديني حاجة أصحابي يسألوهم هي فيها ايه وأغلب الحاجات يقولولي متخافش ده حلال 
وروحنا مدينة Aachen للتزلج في نادي كبير بالليل وطبعا انا مش بعرف اتزلج خالص حاولوا يعلموني بس كان صعب طبعا والجو تلج بس كانت محاوله جميلة واكتفيت بتصويرهم فقط.
باقي الايام اتفسحت تقريبا في كل المدن الكبيرة في الولاية زي Essen Düsseldorf Münster Oberhausen Duisburg ومدن تاني صغيرة مش فاكرها زرت منجم للفحم معمول كمتحف وزرت قلعة كدة في دوسلدورف ده غير حاجات كتيرة من مولات وكريسماس ماركت في كل بلد.
وبالمرة وانا هناك كنت عامل في حسابي اني ازور جامعة معينة قرب بون رحتها وصراحة طلعت مش مناسبه لي وبدأت افكر في جامعات اخرى يعني بشوف الدنيا فيها ايه من غير اي خطط.
والايام القليلة اللي عشتها هناك عرفت يعني ايه اوروبا والنظام لكل شئ وقررت اني لازم ادور على طريقة اعيش بها هناك فترة وخاصة ان فكرة السفر من زمان في دمي بس مش عارف ابدأ ازاي وكانت الدعوة بتاعة اصدقائي بداية كويسه اني افكر جديا في الاستقرار في الخارج واليوم انا خططت للسفر مرة اخرى قريبا بس هتكون طويلة اتعلم فيها اللغة كويس وابدأ دراسة في مجال مناسب.
النظام هناك يتمثل في اشياء كتيرة اكثر حاجة لاحظتها عشان بحبها نظام المرور العربيات ومم يمتلكوها انك لو عندك عربية لازم يكون معاك فيها سترة عاكسة للضوء عشان لاقدر الله واصاب العربية عطل ما لازم تلبسه وتنزل من العربية.
وبرضه لازم يكون معاك ورقة خضرا كدة بتتحط على التابلوه عليها كود واسم تقريبا الحي اللي انت ساكن فيه عشان الحي بيعدي بالليل عشان يشوف مين راكن في مكان سكني مش مكانه او حاجة زي كدة زي مافهمت كان صحبي كل يوم لما نوصل بالليل اطلع الورقة ده واحطها عالتابلوة واللي بتبين انه ساكن في الشارع ده.
في حاجة تالثة لازم تكون معاك في عربيتك حاجة كدة زي مؤشر زي الساعة بتحطه عالتابلوه لو رحت مكان برة مدينتك وسيبت العربية مدة راكنه في مكان ما وبتعمل المؤشر ده على وقت ركنتك للعربية وانك ليك سماح تقريبا ٣ ساعات وبعديها مش عارف ايه اللي بيحصل.
بس هم عندهم قوانين كتيرة لكل حاجة حتى تنظيف العمارة كل شقة عليها يوم في الاسبوع والزبالة كمان.
وقوانين لكل كبيرة وصغيرة طبعا يلاحظها أي انسان يحب النظام ويحترمة 
كانت تجربة جميلة غيرت في الكثير
شكرا لكم 
قصة Mohamed Freitag من ألمانيا

قصتي مع سافر مصر قصص أوروبا سافر سياحة سفر تعليم الدراسة ألمانيا سفارة