قصتي مع السفر والولادة فى أمريكا


قصتي مع السفر والولادة فى أمريكا

السلام عليكم..
انا أحمد حسني اسمحولى بعرض الموضوع ده.. اعتقد انه يهم ناس كتير دلوقتى بما اننا لبسنا فى الحيط والحمد لله.
انا مهندس كمبيوتر عايش فى باريس الشرق (الرياض).. قررت انى مش هكرر غلطة ابويا لما ادانى الباسبور الاخضر.. الجيل الجديد من حقه يعيش ويتعامل بادميه.
قررت ان اولادى يبقوا امريكان..
::::::::::::::::::::::::::::::::::::::::::::::::::::::::::::::::::::::::::
الكلام عن الولاده بس.. مليش اى علاقه بالهجره اطلاقا
::::::::::::::::::::::::::::::::::::::::::::::::::::::::::::::::::::::::::
مش هنتكلم عن الفيزا.. هفترض ان معاك فيزا فعلا.. وان مراتك حامل في الشهور الأولى (او مخططين للحمل).. وحضرتك عاوز تسافر علشان مراتك تولد هناك ومن ثم ابنك يحمل جواز سفر ازرق رائع يعيش بيه آمن في اى مكان.
في الأول.. لازم تكون متجوز.. ظننت هذا واضحا 
ارجوكم.. محدش يعملى بلوك.
دول تجربتين شخصيتين.. هحكيهم زى ما حصلوا بالظبط.. هل فى حاجات تانيه حصلت لناس غيرى؟؟
اكيد في.. بس انا مقدرش أقول الا اللى انا عشته.. بقول آخر.. كل معلومة هنا انا مسئول عنها تماماً.
علشان حضرتك تولدى في أمريكا مش محتاجه اكتر من تأمين طبى يتحمل عنك التكلفه.. علشان واحده تولد على حسابها هناك لازم تكون بنت محمد فريد خميس او متجوزه ساويرس مثلا.. خصوصا لو عرفتوا ان تكلفة الولاده الطبيعيه بتدور حوالين 15 الف دولار.. بينما القيصرى وصلت في بعض المستشفيات الى 50 الف دولار من أبو 18 جنيه.
اذن متفقين.. تأمين طبى يغطى الولاده هو كل ما تحتاجوه.
في حالتى انا.. طفلى الأول رحت على ولايه فى الشمال اسمها ويسكونسن.. كان التأمين الخاص بزوجتى مغطى الولاده.. كل اللى عملته انى كلمت شركة التأمين.. انا عاوز اعمل 1 2 3 .. قالولى اتفضل .. ده رقم الوكيل بتاعنا في أمريكا.. اول ما توصل كلمه وشوف ايه المستشفيات اللى بيغطيها.. وعيش.
وصلت هناك وكلمت الرقم ده.. ادونى ويب سايت دخلت عليه مفهمتش حاجه.. رحت على مستشفى نظيفه وقلت هي دى.. دخلت على الريسيبشن.. انا تأمينى تبع كذا والوكيل هنا كذا.. 
اعمل ايه؟؟
طلبولى شاى.. مسافة ما خلصته.. جت الموظفه معاها ورق كتير اوى وقالتلى اه احنا بنتعامل معاهم.. امضى هنا وهنا وهنا.. خلصت .. تمام.. خد كارت التأمين بتاع مراتك اهو.. ربنا ينتعها بالسلامه.. شوف بقى دكتور او دكتوره هنا تابع معاهم.
وبس كده.
تمت الولاده.. ومدفعتش الا فلوس التاكسيات.. ياللا.. مش مسامحهم فيها.
القصد ايه؟؟
لو تأمينك دولى.. يبقى انت كده في امان تااااااام.. متعملش اى شيء ومتشغلش دماغك بأى شيء.. قبل ما تسافر رتب مع شركة التأمين بتاعتك.. ولما توصل هناك المستشفى هتعملك كل الإجراءات.
ازاى بقى التأمين دولى ولا لا .. وبيغطى ايه ومش بيغطى ايه.. دى تفاصيل تتحقق منها من شركة التأمين بتاعتك قبل ما تسافر.
ارجوك.. متسمعش كلام اى حد الا شركة التأمين.
تمام كده؟؟
::::::::::::::::::::
طيب.. 
الحاله التانيه بقى.. 
المره دى الشركه استندلت معانا.. التأمين بتاعنا مش مغطى أمريكا.. يمين شمال.. مفيش فايده.
طب هعمل ايه.. صعب اوى اتحمل تكاليف الولاده والاقامه مع بعض.. ده انا لو تاجر مخدرات.. مستحيل برضه.
اذن الحل انى أعمل تأمين دولى يغطى..
سألت عليه في السعوديه (مطرح ما انا عايش وورقى كله موجود).. لقيت ان مينفعش اعمله ومراتى حامل فعلا.. وكمان لازم يكون عدى سنه على العقد معاهم علشان اقدر استفيد بحكاية الولاده بره دى.
شيء سخيف فعلا..
بس في حل.
حكومة نيويورك بتقدم خدمة تأمين طبى للطوارىء.. حاجه ببلاش متاحه للأمريكان والزوار.. تأمين طبى شامل مجانى اسمه "Medicaid".. المسئول عنه شركه كبيره اوى هنا اسمها "United Healthcare".
ده ملوش اى شرط الا ان يكون معاك جواز سفر.
بس كده؟؟
اه والله.. بس كده.
طب اعمل ايه.. اروح فين.. أكلم مين؟؟
وهل التأمين ده شغال في كل الولايات؟؟
وبيتكلف كام؟؟
واحده واحده..
ناخد الاسئله من الاخر للأول.. 
- بيتكلف كام؟؟ ولا مليم.. مجاني تماما
- هل هو لناس معينه؟؟ لا.. كل الناس.. حتى الزوار.
- شغال في كل الولايات؟؟ ايوه.. مجرد ما تستلم الكارت.. تقدر تتعامل مع اى مستشفى في أمريكا كلها من أقصاها الى اقصاها.
- اطلعه ازاى؟؟ اه.. هو ده بقى الكلام.
اسهل واسرع طريقه هي انك تروح على مكتب الجاليه العربيه في نيويورك.. هتقابل الست المسئوله عن التأمين ده.. مدام رويدا .. هي شاميه ولطيفه ومتعاونه جدا.. هتساعدك في كل شيء مجانا بدون اى مقابل.. هي موجوده السبت والأحد والأربعاء من 9 الى 5.
عنوان مقر الجاليه اهو..
7111 5th Ave, Brooklyn, NY 11209
العنوان ده في شارع 5.. اشهر شوارع بروكلين.. الشارع في منطقه اسمها "Bayridge" في بروكلين (نيويورك).. منطقه كلها عرب ومحلات أكل حلال.. تقريبا هتحس انك في شبرا مش في أمريكا.
طيب ايه متطلبات تأمين ال "Medicaid" ده؟؟
زى ما قلت.. يكون معاك باسبور انت ومراتك.. ويكون عندك عنوان.. ده مهم جدا لان كل المراسلات هتجيلك عليه.. من غير العنوان.. انت في الضياع.. مش هتقدر تعمل اى حاجه.
طيب انا هقعد عند حد قريبى.. ينفع كده؟؟
اه ينفع.. بس تخليه يروح لصاحب البيت ويعدل العقد علشان يضيف اسمك عليه.. كده كده لما بييجوا يعملوا التأمين بيستعلموا عن العنوان.. لو ملقوش اسمك.. الابليكيشن بتتلغى اوتوماتيك.
قدمت الطلب؟؟
زى الفل.. الحكومه بتوافق عليه وبعد 7 أيام هيوصلك اول ظرف على البيت (نسختين) فيه كم مهول من التفاصيل.. متشغلش بالك.. بعد 7 أيام كمان هيجيلك ظرف تانى فيه الكارت بتاع مرات حضرتك وكارت للمولود مكتوب في خانة الأسم "unborn".
طيب..
كده تمام يعنى؟؟ خلاص كده؟؟
لا لسه.
انت محتاج دكتور او دكتوره تتابع معاها الحمل وتدخلك المستشفى وتبقى مسئوله عن الولاده.. على فكره.. الولاده في أمريكا لازم تكون طبيعى.. مش بيولدوا قيصرى ابدا الا لو الدكتور شاف ان في خطوره على الام والجنين والأب والمستشفى وأمريكا كلها.. حتى التدخل الجراحى برضه بيكون درجات.. نظام فتح البطن ده مش بيحصل هناك الا مره كل 10 قرون مثلا.. في طفلى الأول.. سابونا نعانى 14 ساعه كامله وبعدين استخدموا الشفاط.
طيب.. هل في دكاتره مرشحين للتعامل معاهم؟؟
شخصيا.. تعاملت مع الدكتوره ايمان سلطان.. سوريه.. هي موجوده في نفس المنطقه "Bayridge".. وبتقبل حالات متأخره (بعد الشهر الثامن).. الله يكرمها رتبتلى كل ما يتعلق بالمستشفى.. رحنا مستشفى اسمها 
"The Brooklyn Hospital Center"
في مستشفى تانيه سمعت عنها اسمها لوثرن في بروكلين برضه.. مش فارق.. كلهم زى بعض.. نفس الخدمات هي هي.
الدكتوره حددت يوم الولاده.. لكن ربنا شاء ان بنتى تزهق من الخنقه وتقرر تنزل بدرى يومين.. مفيش اى أزمات.. تتصل على الدكتوره وتروح على المستشفى.. هتحط مراتك معاهم وتروح البيت تكمل لعب على الفيس بوك.. اصل الرجاله مش مسموحلها تتواجد هناك.
طب اعمل ايه تانى؟؟
ولا اى حاجه.. تقعد في البيت.. تصلى وتدعى ان مراتك تقوم بالسلامه وان العيل ينزل سليم معافى.. وتنتظر لحد ما يجيلك التليفون وفى صوت صراخ طفل مزعج.. مبروك انت بقيت بابا.
المستشفى هتاخد منك بيانات الاب والأم.. هيعملولك كل إجراءات شهادة الميلاد.. بعد 8 أيام هتوصلك نسخه اصليه على عنوان بيتك.. لو مستعجل.. ممكن تروح مبنى المحكمه تستلمها من هناك بعد يومين بالظبط (وممكن تعمل اكتر من نسخه احتياطاً).. بعد 3 أسابيع هيوصلك رقم الضمان الاجتماعى "Social Security No" على عنوانك.. مبروك .. ابنك بقى مواطن امريكى وعنده حقوق مصريه 
..تقدر بعد كده تعمل جواز السفر عادى جدا.. بس ده اعتقد محتاج موضوع لوحده علشان في تفاصيل كتير.
بس يا معلم.. كده انت لبست في الحيط تماما وأصبحت الشقة من حق الزوجة.. و المرتب من حق البامبرز وده جزاء اللى ميسمعش كلام اللى اتجوزوا قبليه لما قالوله انج سعد فقد هلك سعيد.
والف مبروك مقدما.
::::::::::::::::::::
اسئله رخمه
=======
(س): اسافر امتى؟؟
(ج): اول مره انا سافرت ومراتى في اول الشهر السابع.. تانى مره سافرنا في اول التاسع.. اعرف ناس سافرت في الأسبوع ال 35 وولدت بعد الوصل باسبوع.
(س): هو مش شركات الطيران بتمنع ركوب الحوامل؟؟
(ج): اه ولا.. الخوف من ركوب الحوامل هو الخوف من احتمالات الولاده المبكره.. طبيا.. مفيش اى خطر.. انما الشركات مش عاوزه تاخد اى مخاطرات..
(س): طب اعمل ايه علشان اتفادى القلق؟
(ج): خد تقرير من الدكتور اللى حضرتك متابع معاه ان مفيش خطوره من ركوبها الطياره وان معاد الولاده المقترح فاضل عليه وقت اد كده.. ده سهل جدا واى دكتور بيعمله (في مصر والخارج).
(س): بس انا سمعت انهم ممكن يرجعونى من المطار علشان مراتى حامل.
(ج): اونطا.. اول مره ظابط الجوازات سألنى.. هي حامل.. قلتله ايوه.. بص على بطنها وشاور وضحك وقال "هاى جونى".. رغم ان الواد مش جونى ولا حاجه.. تانى مره مسألنيش اطلاقا ان كانت حامل وللا لأ.. اول مره دخلت من المطار (نيويورك) في اقل من ربع ساعه.. تانى مره المطار كان زحمه اوى.. قعدت ساعتين كاملتين.
(س): امال ايه اللى بنسمعه عن الدخول وان في ناس رجعوها والكلام ده؟؟
(ج): ملهاش قواعد.. اعرف ناس نزلت من الطياره قبل ما تطلع.. اه ده ممكن وكتير.. واعرف ناس وصلت هناك وقعدت 4 ساعات محتجزه للاستعلام الامنى.. كده كده الطياره مش بتطلع من مصر او الخليج عموما الا لو خدت ال "Ok" من المطار في أمريكا.. كونهم بقى رجعوا حد وصل فعلا هناك.. دى حالات نادره جدا.
(س): طيب هل الميدكيد له عيوب؟؟
(ج): في بعض الشائعات بتقول انه ممكن يمنعك من انك تاخد الفيزا تانى.. بس ده مش صح لان عندى جيران في السعوديه أطفالهم اتولدوا بالتأمين ده وجددوا الفيز عادى جدا.. انما في كلام ان التأمين ده نفسه هيتمنع للزوار.. ترامب قافش شويه.. عموما هنعرف من الأخبار.. تانى بكرر.. الحاجه اللى فعلا هتديلك بلوك من دخول أمريكا هو الكذب.
(س): هل اقدر بنفس كارت الميدكيد اروح ولايه تانيه غير الكئيبه نيويورك؟؟
(ج): طالما المستشفى بتتقبل تأمين الميدكيد.. يبقى انت حر.. انشالله تروح القمر.. لو في مستشفى عجبتك.. كلمهم واسأل.. بتقبلوا ميدكيد.. اه.. يبقى روح.. لا.. يبقى خليك اتعذب في نيويورك.
(س): طب اقعد فين وهصرف كام وهعيش ازاى؟؟
(ج): نيويورك هي أسوأ مدن أمريكا.. وقد يكون العالم.. غاليه وزحمه ورخمه.. ولكن لا مفر.. اقل شيء ممكن تلاقيه للسكن هيكون في حدود 2500 دولار شهريا وتقريبا مش اقل من 1000 دولار مصروفات شهريه لو انت ومراتك قررتوا تعيشوا على الجبنه والزيتون.. وصعب اوى اوى انك تلاقى حد يرضى يأجر بالشهر.. كله هناك بيأجر بالسنه.
(س): ممكن مراتى تسافر لوحدها وانا احصلها؟؟
(ج): لو انت واثق انها تقدر تعمل الإجراءات دى لوحدها.. يبقى ابعتها.. الستات هنا لها مكان وتقدير اعلى من الرجاله على فكره.
(س): ليه نيويورك.. وليه بروكلين تحديدا؟؟
(ج): حسب معلوماتى.. تأمين الطوارئ المجانى مش بيطلع الا في نيويورك بس.. كل ولايه هنا لها قانون خاص بيها وكأنها دوله مستقله.
(س): طيب انا مش بعرف أتكلم انجليزى؟؟
(ج): مش أزمه.. وقت الحاجه.. تهته وقولهم انا عاوز مترجم.. هيجيبوا مترجم.. ده حقك مش تفضل منهم ولا حاجه.. انا شخصيا كنت بطلب مترجم.. المصطلحات الطبيه مش هيقدر يفهمها الا الدكاتره وابليس.. اعوذ بالله من ده انجليزى.
(س): طيب في ناس بتقول...
(ج): من غير ما تكمل.. نفض لكل ده.. الكلام اللى تصدقه هو كلام الجهات الرسميه بس.. شركة التأمين.. المستشفى.. او حد عاش التجربه بنفسه.. مش عن طريق حد ولا بالسمع.
وفي حل أسهل من كل ده..
السنجله جنتله.. لا جواز بلا وجع قلب.. انت تعيش ملك وبفلوس الجواز والسفريه دى.. تطير على أوروبا تلفها كلها من الشرق للغرب وتاخدنى معاك علشان ادعيلك واترجملك لو احتجت.. وممكن كمان اشيلك الشنطه لو حبيت.
مبروك على كل الحوامل مقدما.. وتحت امركم في اى استفسار.
اعذرونى لو اتأخرت فى الرد على اى حد.. فعلا فى كم مهول من الاستفسارات و الرسائل.. مصر كلها تقريبا قررت تهج من البلد
فريق عمل سافر يتقدم بخالص الشكر لـ أ/ أحمد حسني على المشاركة 
اعرف أيضا عن الخدمات التي تقدمها شركة سافر من هنــا
مجانا أمريكا إقامة طيران امريكا مصر سفر أوروبا سياحة سافر