الغربة بها سم قاتل


" الغُربة بها سُمُّ قاتل "

قصة من مجهول:
تدور أحداث القصة حول شاب قرر أن يسافر ويحصل على فيزا من دولة الكويت ليكوّن مستقبله كما يحلم الكثيرون , بعد أن قضى من عمره 16 عام منظومة التعليم المصرى (الفاشلة) ليخرج منهم بـ ورقة تحمل اسمه ويحصل على بكالوريوس فى " البتنجان المقلى " تشبه كثيراً ورقة اللحم التى يستخدمها الجزّار , وشهادات خبرة بعدد "ورق الكوتشينة" كل ورقة لها وقت مناسب للعب ولا تكتمل اللعبة إلا بها ويزيد عليهم " عاميين من المرمطة والكحرتة " بين الشركات والمصانع والمستشفيات والقرى السياحية والبارات والسيبرات و أستغلال الأجازات الصيفية بين سنين التعليم المختلفة ليكتسب الخبرة والمهارات واللغات التى تساعده على إيجاد الوظيفة التى يحلم بها .
بدأت القصة بسفر الفتي إلى الكويت فى السابع من أبريل 2013 بعد أن إحتفل مع أصدقائه بعيد ميلاده الثانى والعشرون بـ ستة أيام , يصعد إلى الطائرة لأول مرة فى حياته وقبل أن تطأ قدماه بابها ينظر خلفه لِيَشتَمّ رائحة بلاده يري صفحات حياته تمرُّ أمام عينيه يستنشق أخر نفس و يدخل ليتحول الحلم إلى كابوس , وجوه يملأها الحزن والفراق , جسد يجلس فوق المقعد بدون عقل , عينين "مفنجله" ولكنها لا تري شيئاً , أري الطير على رؤوسهم حقاً , تقلع تهبط الطائرة ولم أري شئ من الذى يحدث فى الأفلام .
هبطت الطائرة بمطار الكويت الدولى بعد ساعتين من إقلاعها من مطار الأقصر الدولى , أرى كل العيون تنظرني وكذلك أنا أبحث عن من ينتظرني لأجد يد أبى وأخى الأكبر يشاوران من بعيد , اركب معهم وننتقل إلى السكن الذى يبعد نصف ساعة من المطار .
ربما لم يعرف أبى كيف ينصحنى ليتم قبولي للعمل فى الشركات لأنه يهوي العمل الحر , قضيت سبعة عشر يوماً فى العمل معه قبل أن تقع عينى على إعلان فى جريدة "مطلوب بكالوريوس بتنجان مقلى" بدون أى تفاصيل أخرى سوى رقم الجوال , دقيت عليهم ليحدد مقابلة شخصية بعد 3 أيام فى ميعاد العمل الرسمي , ذهبت وأنا أرتدى بدلة لأجلس مع المدير الذي يرتدى "دِشْدَاشة وغِتْرَة وعِقَال" وتم تعييني بعد المقابلة بيومين ... لن أطيل عليكم فى تفاصيل ربما لم تكن مهمة بالنسبة لكم ولكنكم ستعيشونها وتشعرون بأهميتها فى يوم ما و ربما أذكر بعض منها فى العناويين التالية .
الكويت فى عناوين

1 - الشكل والمظهر الخارجى أهم حاجة فى الشغل وبره الشغل كمان وربما تسيطر البشرة السمراء على معظم الوظائف الحساسة فى البلد ؟ لإعتقادهم ان الأشخاص السمر سواء كويتي أو أجنبى أكثر أماناً وثقة عن غيرهم .
2 - يمتلك السوريين والمغاربة السيارات الفارهة والبدل الماركات وربما لا يملك فى جيبة دينار ؟ يعتقدون ان اشباع رغباتهم وشهواتهم أهم شئ ! مبيفكروش فى بكرة ودايما كانو بيقولولى أن كل يوم برزقه .. حالكم المصريين بتحكو "أصرف ما فى الجيب يأتيك ما فى الغيب".
3 – طريقة التعامل معاك من قِبل الحكومة أو الأشخاص العاديين بتكون على أساس :
أ \ مظهرك الخارجي بما تحمل الكلمة من معنى .
ب \ الهَويَّة "البطاقة الشخصية" تاريخ الإنتهاء وأسم المؤسسة اللى انت تابع ليها ؟ لو مؤسسّة حكومية محدش بيقدر يفتح بوقه معاك .
ج \ اللهجة بتاعتك لو كويتي أو سعودى هتعمل اللى انت عايزة ومحدش هيعرف ياخد منك حق ولا باطل.
4 - الشغل هناك بيعتمد على 30 % لو الواسطة كويتى (20 % لو الواسطة أجنبى ) 20% لغة أنجليزي 10% ورقة اللحمة , 20% خبرة فى المجال اللى هتشتغل فيه , 10% المظهر الخارجى وطريقة الكلام والثقة فى النفس , 10% فهلوة وحداقة .
5- اهم حاجة لازم تتأكد منها قبل متسافر :
أ \ الفيزا اللى هتتبعتلك لازم تمسكها بأيدك وتتاكد من بيانتها كويس جدا وأهم البيانات فيها
( مدة العقد سنة او أكتر , أسم المؤسسة وتبحث عنها لو "جاخور أو مزرعة" أحسنلك متسافرش , الراتب فى عقد العمل زى مـ أنت متفق عليه ولا فيه تغير ولو قالك لما تسافر هنعدله بردو متسافرش غالبا بيكونو نصابين , مهم جدا تعرف السكن على الشركة ولا على حسابك , تتاكد من تذاكر الطيران بتبقى على حساب الشركة وانك مش بتدفع فيها مليم لأن المندوب بينصب وياخدهم لحسابه , لازم تتأكد ان الفيزا مادة 17 او مادة 18 لأن المواد دى بتقدر تحول من شركة لشركة بسهولة وانت جوا البلد انما لو أى مادة تانية زى 20 و 22 مش هتعرف تحول إلا إذا سبت البلد والفيزا اتكنسلت وترجع تكشف وتروح تعمل ورق فى السفارة كأنك طالع أول مرة من أول وجديد )
ب \ المكان اللى هتسكن فيه وده يعتبر 50% من الغربة لو أستريحت فيه هتعرف تكمل وأهم حاجة لازم تعرفه (بُعد السكن عن الشغل لازم تختار مكان قريب تسكن فيه عشان متتعبش , حاول على قد متقدر انك تسكن مع اللى شغاليين معاك او مع ناس بيصحو وينامو فى نفس المواعيد بتاعتك , اشترك مع الناس اللى معاك واعملو أكل بيتي لأن الأكل لوحدك بره مُكلف)
6 - " اللَّيسِنْ " كما يطلقون عليها اللى هى رخصة قيادة السيارة بتوفّر عليك نص الوقت ونص المجهود اللى بتبذله فى اليوم وهناك السيارة بتمن الموتوسكل الصينى فى مصر والبنزين رخيص جدا وممكن ببلاش كمان , اهم حاجه عشان تطلع رخصه لازم يكون معاك " ورقة اللحمة " مؤهل عالى + المهنة فى عقد العمل "مش كل المهن بيطلعلها رخصة" + راتبك فى عقد العمل أكبر من 450 دينار ما يساوى 11 ألف مصرى + يكون عدى على تاريخ دخولك للكويت سنتين إقامة .
7 - كروت الزيارة وفى منها أنواع
أ \ الكارت السياحي : مدته 3 شهور بغرض السياحة فقط ولا يسمح لصاحبه بالعمل أو الدراسة أو التحويل للإقامة
ب \ الكارت العائلى : من 3 إلى 6 شهور ولا يسمح لصاحبة بالعمل أو الدراسة أو التحويل للإقامة .
ج \ الكارات التجارى : ليس له مدة معينة , ممكن يبقى شهر وممكن يوصل لسنتين , يسمح فيه بالعمل ويسمح التحويل إلى إقامة عمل ولكن بشروط .
8 - تحويل كروت الزيارة إلى فيزا للعمل : الموضوع ده صعب جدا ومش مضمون كأنك بتشترى سمك فى ميه ونسبة الموضوع ده 50% ممكن أه و ممكن لا وبيعتمد على قرارات مجلس الأمة اللى هى كل يوم بتتغير وكمان لازم موافقة من وزير الشئون الإجتماعية والعمل اللى فى 2013 اتغيروا 3 مرات كل واحد بقوانين جديدة من الأخر لو الموضوع اتعرض عليك من حد انت مش واثق فيه متقبلهوش ولو قبلته متدفعش ولا جنيه غير لما تسافر هناك و كل أوراقك تخلص وتستلم بطاقتك المدينة فى أيدك .
9 - "الكفيل" مصطلح يطلق على صاحب العمل أو مدير الشركة وهو اللى بتبقى روحك فى إيده اللى غالبا بيكون متقلب المزاج فى منهم ناس بتخاف ربنا بس أغلبهم طماعين وعايزين الحرق وعاملين فيها فاهمين كل حاجه وهو لا يفقه شئ وبيذلك بمعني الكلمة لو أنت عايز منه خدمة أو يخلصلك ورق اللى هو محدش ينفع يخلصه غيره .
10 - "التَّفحِيطْ" كلمة يطلقها الشباب على انك لما تعمل خمسات بالسيارة (تِخَمِّس) وعادتاً يتفاخرون بألقاب العائلة والنسب ويميلون إلى السيارات السبورت المانيوال والمكنة الهوندا و بي إم دبيلو والمغربيات واللبنانيات والمصريات.
11 - "الثراء الفاحش" تحول الشعب الخليجي فى سنوات قليلة من عيشة الخيام والصحراء القاحلة ورعى الإبل والأغنام للعيش فى القصور و ناطحات السحاب والسيارات الفارهة والخدم كل هذا بسبب ثورة البترول , لا أدري ماذا يحدث لو إنعدمت ؟ لك أن تتخيل ! يعيشون على هواء المكيّف فى المنزل وفى السيارة وفى العمل ؟ معظمهم يعيش على المياة المعدنية ؟ ماذا لو انتقطعت الكهرباء والماء لـ ثلاثة أيام متتالية ؟ لك أن تتخيل !
12 - "الخدم" ليس لهم وجود هم مجرد "ألات" لا صوت لا حركة لا رأى لا حقوق لا شئ , يقول لى صديقي الخادم الهندي أخرج مع ماما "يطلقون هذا الاسم على ربة المنزل اللذين يخدمون فيه وبالمثل كلمة بابا" بالسيارة إلى احد المولات التجارية ويأتون بالهديا لهم ولباقى العائلة حتى الكلاب والقطط لا ينسوها من الهديا الثمينة وانا جائع أريد أن أأكل أو أشرب أى شئ على حسابى "مع العلم أن راتبه الشهري لا يتعدى ثمن عشاء لشخصين منهم أو ثمن الطوق الذي يلبسه الكلب أو سلسلة القطوة التي غالبا تكون من الفضة" ولكن ماما ترفض وتصرخ وَخّر يالخَايسْ "كـ التي دخلت النار فى هرة لا هى أطعمتها ولا هي تركتها تأكل من خشاش الأرض" أعتذر على بشاعة التعبير ولكن الحقيقة أبشع بكثير .
13 - "الكادحين" رجل يبدأ يومه قبل صلاة الفجر يخرج لعمله يرجع قبل صلاة المغرب وربما بعد ذلك يغسل ويطبخ ويكنس ويمسح و يكوي "شغال راجل وست" ينتهى يومه فى التاسعه مسائاً ليذهب للنوم ويعيد يومه كل يوم , ربما يتسهويك الحديث معه ليُفجِّر ما بداخله من هم وحزن وإشتياق وعتاب
بؤس 
- أمي وأبويا وحشونى نفسي ألاقي شغل فى بلدى لو نص اللى بعمله هنا بس كفايه أقعد جمب مراتي وعيالى :( "كفاية إننا ننام كل ليلة فى حضن بعض" أنا عمري ضاع فى الغربة وبرجع بيتى زى الضيف باخد شهرين ومش ببقى طايق البيت وعايز أمشى , طيب لو نزلت بلدي هشتغل إيه والمسؤليات والديون اللى عليا أعمل فيها إيه قولي؟
- حبيبتى خاطبها بقالى 3 سنين ومش عارفين نتجوز وهموووت مش قادر أبعد عنها وكل يوم تعيطلى و بتصعب عليا لما أجى أكلمها :( طيب لو اتجوزنا أنا مش بنزل مصر غير شهرين أو تلاته كل سنتين يعنى اتجوزها واسافر أرجع ألاقيها مخلفه أبنى اللى انا مشفتهوش غير بعد سنتين :(ولو جبتها هنا مش هقدر أتحمل المصاريف أعمل ايه قولي؟
- و خلصت كل الأعزار اللى عندي وأنا مش قادر أرتبط بيها دلوقتى أنا فعلا مش قد المسؤلية دى هجيب منين شقة ومهر وعفش وأبوها اللى عايز يعيشها فى مستواه اللى وصله بعد 40 سنة وانا لسه بقول يا هادي فى حياتى ! طيب أسيبها واعيش حياتي هنا واتجوز ومرجعش بلدي تاني مش عارف مش عارف قولي أعمل إيه؟
- حوّشت فلوس والحمد لله مرتاح مادياً بس بردو مش حاسس بالمتعة الفلوس مش كل حاجه حاسس ان عمري ضاع مني حتى ناسي وصحابى بتوع زمان الدنيا نسيتنا بعض والمسؤليات اللى عليا هنا متخلينيش أقدر انزل بلدي حتى عيالى ومراتي لما بجيبهم هنا مش بحس اني مرتاح منا طول النهار فى الشغل وبرجع تعبان ومش بعرف اقعد معاهم وبحس بالتقصير بس مش بإيدي ! هي دى الدنيا هنعمل إيه؟
- أنا سيلاني خمسة سنة ما يشوف بلاد , بتشا مال أنا الحين داخل مدرسة , بابا ماما ما يبي يشوف بلاد مشان شغل مال هو يسّكر ما فى نفرات يودي بتشا مدرسة ما فى نفرات يغّسل يمّسح يضرب ما فى نفرات يسوي قهوة شاي تمر يسوي أكل ! شو نسوي ؟
الترجمة (انا واحد سيريلانكى ليا خمس سنين منزلتش بلدي . ولدي الصغير دلوقتى فى المدرسة , الكويتي مش عايز يخلينى أنزل عشان شغله هيقف مفيش حد يوصل عيالة المدرسة مفيش حد يغسل يمسح ينضرب مين هيعملهم تمر وشاي وقهوة ! قولي أعمل إيه ؟)
((يُقال أن هناك بعض العائلات فى هذه البلاد تُبِيح أن يتزوج الأخ زوجة أخيه فى غيابة أذا أكمل زوجها خارج البلاد أكثر من عامين والأبناء التي تنجبها الزوجة خلال فترة غيابه تنسب لزوجها الأول حين يعود أو لم يعود , وهذه عادات و تقاليد متعارف عليها فى هذه البلاد))
- أنا شغالة والحمد لله راتبى كويس وعايشة حياة كويسة بس لو العمر رجع بيا مكنتش اخترت العيشة هنا كنت هكافح فى بلدي أنا مش قادره أصدق ان مبقتش تفرق معايا اى حاجة حتى أهلى وصحباتى البنات قلبي جفي ومبقوش يوحشوني وبقيت أنساهم بالشهور وحاسة إني بكلم أهلى ملامه مش أكتر , اه الغربة عيشتني عيشة محترمة بس سرقت مني أجمل سنين عمري وأجمل ذكريات فى بلدي وخلاص مفيش حل غير كده مش معقول هنزل واتمرمط بعد متعودت على العيشة ده قولي واحدة زى تعمل إيه؟
* الزتونة (نصيحة واحد مجرّب)
ابدأ فى بلدك لو من تحت الصفر مسيرك هتكبر بعد متقع وتوقف وتتعلم وهتتعب وهتعدى عليك أيام مفيش في جيبك ولا مليم وهموم الدنيا كلها فوق كتافك ومتحطم نفسيا ومعنويا لأبعد مما تتخيل وهتقف تانى على رجليك وساعتها هتكبر فى بلدك وسط أهلك وصحابك وعيالك ومراتك ساعتها بس هتعرف يعنى إيه الغربة بها سم قاتل .
أخيراً هذا الكلام من واجع تجربة حقيقة مريرة (رأي يحتمل الخطأ أو الصواب).
نكتفي بهذا القدر، لنا عودة ..
سافر سفارة السعودية الكويت مسافرين مصر مطار قصص إقامة