منحة الحكومة البريطانية - تشيفننج Chevening


منحة الحكومة البريطانية - تشيفننج Chevening

بالتعاون مع كشك سيف
- ازيكم ياكشكاوية : موسم المنح العظيمه بدأ وبدورنا كتبنا مقدمه عن المنحه من اسبوعين تقريبا ودلوقتى معاد شرح المنحة بالتفصيل زى كل سنه بقلم الزميل : ابراهيم فاروق .

مميزات المنحة : 
1- كل مصاريف دراستك في بريطانيا .. حوالي 400 ألف جنيه مصري.
2- مرتب شهري للمعيشة في بريطانيا .. 1000-1200 جنيه استرليني .. يعني حوالي 28000 جنيه مصري شهريًا .. عشان الناس اللي بتحب تحسبها بالمصري. 
3- مصاريف تأشيرة بريطانيا.
4- مصاريف تذاكر الطيران ذهاب وعودة.
5- الماجستير لمدة سنة واحدة فقط.
6- تقدر تشتغل دوام جزئي في بريطانيا لمدة 20 ساعة أسبوعيًا .. يعني حوالي 4 ساعات في اليوم.
7- مش شرط تقديرك في الكلية.
8- مش شرط تحضر الماجستير في نفس مجال تخصصك .. يعني هتدرس الحاجة اللي بتحبها.
9- مش شرط سن معين.
10- تقدر تدرس في أي جامعة أنت حابب تدرس فيها .. مش بيفرضوا عليك جامعة بعينها.
11- لو معاك ماجستير أو دكتورة تقدر تقدم عادي.

شروط المنحة:
1- لازم يكون معاك البكالوريوس أو الليسانس.
2- امتحان الأيلتس ماتجيبش فيه أقل من 6.5 ودي سهل تجيبها .. أو التويفل على الأقل 79.
3- لازم يكون عندك خبرة في المجال اللي أنت هتدرس فيه الماجستير لاتقل عن سنتين أو 2800 ساعة عمل.

الأوراق المطلوبة: (كل ده هتسحبه سكانر)
1- صورة الباسبور.
2- شهادة البكالوريوس أو الليسانس.
3- بيان الدرجات.
4- 3 خطابات توصية، من ناس اشتغلت معاهم، أو دكاترة درسوا لك وعلاقتك بهم كويسة.
5- الخطاب الشخصي، وده اكتبه بنفسك، ماتجيبوش من عالنت وخلاص.
6- أنك تذكر 3 برامج حابب تقدم فيها في بريطانيا .. ولازم يجيلك منها قبول غير مشروط من الجامعة قبل 12 يوليو 2018 .. وتقدر تعدل حاجة فيهم في الانترفيو عادي.
7- شهادة الأيلتس وده تقدر تقدمه قبل 12 يوليو 2018 .. يعني تقدر تقدم من غيره عادي.
بعد سنة واحدة هيكون معاك ماجستير في حاجة بتحبها من أفضل الجامعات في بريطانيا، وكمان هتحوش مبلغ كويس، وكمان ممكن تشتغل ويكون عندك خبرة شغل في بريطانيا.

موعد التقديم:
من 7 أغسطس 2017 حتى 7 نوفمبر 2017 .. تقدر تقدم وتعرف كثير من التفاصيل من هنــا
الكشك بيقولك: لو نسيت تدرس انجليزى فإحنا بنفكرك ان الانترنت لسه مجانى وتقدر تستفيد وتتعلم منه وتستخدمه فى مصلحتك , والمنح سهل كمان القبول فيها والسفر لكن دا بيلزم منك فهم لشروط كل منحه والشروط حتى لو ساعدناك فى شرحها فدا مش كفايا , اجتهد وإبدا من دلوقتى وراجع صفحتنا لو عندك مشكلة مع اللغه هتلاقى طرق كتير مختلفه وفى منهم طريقه تناسبك عشان تتعلم والمنح جايه كتير بس انت حاول .
متنساش : اى سؤال يستعصى عليك ! إسال مستر جوجل وهتلاقى مئات الاجابات عليه وكلها خبره وتوضيح عشان تسهل عليك لو المنحه مناسباك .
ليه بنساعدك : لما كلنا نحقق طموحاتنا ونعيش بشكل احسن دا هيأثر على ولادنا وتعاملهم مع بعض فى المستقبل وهيلاقوا ميراث كويس يعيشوا عليه , زى مافى ناس هدفها اتلاف عقولنا عشان تكسب من ضعفنا , فى ناس تانيه عاوزين الخير والنجاح للجميع وبنحاول نكون منهم فى نشر المعرفه والعلم والفرص وتأهيل الشباب وتحقيق اهدافهم . ومش لوحدنا اللى بنعمل كدا , ففضلا استفيدوا من المعلومات ويلا نفرح كلنا.
أوروبا سافر إقامة سفارة جامعة الدراسة تعليم Chevening بريطانيا منح دراسية منح