تعمل إيه لو اترفضت فى فيزا شنغن


نصيحة لأي حد اترفض في فرنسا أو شنجن بصفة عامة، أو حتى أول مرة هيقدم شينجن، أنا النهارده لسة واخد فيزا شينجن وحبيت أشاركم تجربتي...
بعد مؤتمر فرنسا اللي فات (COY11) و لما لقيت ناس كتير خدت الشينجن قررت أقدم سياحة فرنسا، قدمت يوم ١٣ ديسمبر اللي فات (انا طبيب ومتزوج وعندي بنت وسافرت تركيا كذا مرة وكرواتيا وختم البوسنة عندي علي الباسبور) ورقي كان كامل، وعملت برنامج سياحي لفرنسا وأيسلندا بحجز فندق وطيران مؤكد ،،، وبعد ٧ ايام بالظبط وصلني ايميل من تي إل إس، إن الباسبور رجع ولقيت الختم في الباسبور وورقة الرفض ،،
طبعا اكتئبت لأن مفيش سبب مقنع للرفض، ورقة الرفض فيها السبب التامن اللي الكل بيترفض بسببه، المهم قعدت ادور على معلومات الاستئناف واللي وصلتله ان الإستئناف ملوش أي لازمه....
قعدت اقرأ في مواقع اجنبية إن فيه دول شنجن نسبة الرفض فيها أقل بكتير من دول تانية، من اقل الدول دي (ليتوانيا، لاتفيا، استونيا، ايسلاند، سلوفاكيا ، سلوفينيا) والدول دي مفيش مصريين بيفكروا يروحوها، وبيقدموا في سفارات رخمة زي المانيا وايطاليا وبيترفضوا ،،،
المهم دخلت مواقع السفارات دي، واخترت لاتفيا واتصلت بيهم، رد عليا واحد بالإنجليزي مبيتكلمش عربي، قلتله إني عايز أسافر لاتفيا سياحة ولسة واخد رفض من فرنسا، هل في مشكلة أقدم، قالي لا مفيش مشكلة، جهز ورقك و قدم في أي وقت، حجزت ميعاد في السفارة يوم الاتنين ٤ يناير وكان الاوراق كالاتي:
١- استمارة الشنجن مملية اونلاين ومطبوعة.
٢- صورة ٣.٥ x ٤.٥
٣- تأمين صحي للشينجن
٤- كشف حساب 6 شهور، ولو عندك كريدت كارد حط آخر ستيتمنت له.
و طبعا القنصل في الإنرفيو قعد يدقق في كشف الحساب يشوف الحركات ويتأكد اني مش عامل إيداع مبلغ كبير مرة واحدة قبل الانترفيو ..
٥- خطاب من الشغل فيه تاريخ التوظيف والمسمى الوظيفي والمرتب وأهم حاجة ان الشغل على عِلم بسفرك في المدة الفلانية وانك هترجع لعملك في التاريخ الفلاني بعد السفر. 
٦- حجز طيران وفندق مؤكدين، بيتصلوا بالفنادق يشيكوا على حجزك، الطيران ممكن مجرد حجز مبدأي بس الفنادق لأ.
٧- خط سيرك في الرحلة، أنا عملت itenerary بكل المزارات اللي هزورها في كل يوم.
٨- انا ترجمت قسيمة جوازي وشهادة ميلاد بنتي كدليل على رجوعي مصر، القنصل شافهم وقرأهم كويس ورجعهوملي تاني لأنهم مش من الورق المطلوب.
يوم الانترفيو رحت وقدمت الورق للقنصل، طبعًا الانترفيو بالإنجليزي فقط، ومكتوب على موقع السفارة إنك لو مش بتتكلم إنجليزي تجيب معاك مترجم، سألني ليه رايح لاتفيا، واشمعنى لاتفيا، بتشتغل إيه، ليك إخوات، سافرت فين قبل كده، إيه هو التعداد السكاني للاتفيا، ريجا العاصمة كبيرة ولا صغيرة، لاتفيا بتقع على بحر اسمه ايه، كل الأسئلة دي عشان يتأكد إنك قاري وعارف انت رايح فين مش رايح تهرب أو واخدها ترانزيت لدولة تانية، انا الحمد لله كنت قاري وفعلا ناوي اروح الدولة دي وجاوبت علي كل الاسئلة دي، بعد كده سالني على رفض فرنسا قلتله إنه رفض غير منطقي لأن ورقي كله كامل، المهم خلصت و شكرني و قاللي هيبعتلي ايميل في خلال اسبوع أو عشر أيام.
بعد ٣ ايام إنهارده جالي إيميل إن الفيزا جاهزة، روحت استلمتها النهارده، سينجل انتري لمدة ١١ يوم زي ما طلبت 
صدقوني الرفض ملوش أي قيمة، خليكم في السفارات السهلة، وإوعوا تقدموا وورقكم مش كامل، كل تفصيلة بتفرق، بالتوفيق 

*القصة منقولة من مجتمع سافر وكل ما ورد فيها يعبر عن رأي ومعتقدات صاحب القصة، شكرًا لبطل القصة لمشاركتنا قصته ونصائحه المهمة دي.

إذا كنت لا تعرف سبب رفض فيزا شينجن فنحن قمنا بشرح كل الأسباب هـنــــا

اعرف أيضا كل المستندات المطلوبة للحصول على فيزا شينجن  من هنا
اعرف أيضا عن الخدمات التي تقدمها شركة سافر من هنــا