إزاي تغير المهنة في البطاقة من (حاصل على) إلى أي وظيفة وتثبتها في الباسبور.

لو أنت مش بتشتغل أو بتشتغل بس شركتك متعسفه  في موضوع إثبات الوظيفة أو بتشتغل شغل حر فالكلام ده ليك

أولاً : نقاط يجب وضعها في الأعتبار عند إثبات وظيفه في الباسبور
- لو أنت بتشتغل وعندك خبرة اختار الوظيفة بتاعتك أفضل او المقاربة لها، أما لو مش بتشتغل ومعندكش خبرة فحاول تختار مجال وظيفي يكون هو اللي هتمشي فيه مستقبلا.
- كل أصل من ورقك صوره كذا صورة والبطاقة القديمة صورها كتير علشان هتحتاجها تقريبا في كل إجراء بتخلصه.
- كل ورقة بتخلصها راجعها واتأكد ان البيانات سليمة، لأن غلطة الموظف أنت اللي هتشيلها.

الخطوات 

المرحلة الأولى: مكتب العمل

هتروح لمكتب العمل التابع لعنوانك المسجل في البطاقة ومن هناك هتعرف المطلوب لأستخراج شهادة مزاولة المهنة

الأوراق المطلوبة:
1- أصل البطاقة + صورتين منها
2- صورتين شخصيتين حديثتين
3- برنت تأمينيات
(برنت التأمينات) بيتجاب من التأمينات والمعاشات، فلو أنت متسجل في التأمينات تروح للشباك المخصص وتقوله عايز برنت تأميني وتديله البطاقة حيطلعهالك ويختمهالك أو تروح تختمها من شباك الأختام، أما لو مش متسجل ففي خط ساخن تقدر تتصل بيهم وتسجل نفسك وبعدها تروح تعمل البرنت زي ما شرحت .

4-حوالات بريدية
ودي ممكن تختلف عددها وقيمتها حسب مكتب العمل فعلشان كدة لازم تروح هناك الأول ومتجبهاش من دماغك، بس عموماً بيبقى في دفع حوالتين بقيمة 33 و 40 جنية ودي موجودة في أي مكتب بريد بتقول للموظف في الشباك أنا عايز حوالات بقيمة كذا وكذا لحساب مكتب العمل، لو  أداك الحوالات الجديدة المطبوعة كمبيوتر فـ هتصور كل حوالة صورة أو اتنين أما لو أداك  الحوالات القديمة المكتوبة يدوي فمش هتحتاج تصورها لأن كل حوالة عبارة عن أصل أبيض وصورة حمراء .

هتاخد كل الأوراق دي وتطلع على مكتب العمل وتقوله عايز أعمل شهادة مزاولة مهنة، لو أنت عارف الوظيفه اللي أنت عايزها قوله الوظيفة على طول ولو مش عارف هتلاقي معاه ورق فيه كل الوظائف المتاحة او هتكون متعلقة على الحيطة أختار منها اللي يناسبك أ أقرب حاجه لتخصصك.

الموظف هياخد أوراقك وهيطلع استمارة من عنده أو هيقولك هاتها من المكتب اللي جنبي بجنية وهيقسمها نصين، نص هيدبسه مع نص أوراقك والنص التاني مع باقي الورق.
النص الأول دة هيروح للمكان اللي هتمتحن فيه والنص التاني هيروح لمديرية القوى العاملة بعد ما تنجح في الأمتحان وتاخد الشهادة.
-هتروح لمكان الأمتحان في الوقت المتحدد لك في الأستمارة (نص الأوراق الأول)، الأمتحانات في الغالب بتبقى سهلة ومفيهاش مشاكل والمشرف نفسه بيتساهل في المواضيع دي لأنه عارف أن غالبية الناس بتعمل الموضوع دة علشان تسجلها في البطاقة، درجات النجاح بتبقى إما محدود القدرات أو ماهر، كدة كدة مش هتفرق معاك الدرجة لأنها مش هتتكتب في البطاقة المهم أنك تنجح وخلاص، لما تنجح الموظف هيقولك تعالى بعد يومين مكتب العمل اللي قدمت فيه علشان تاخد الشهادة، هتروح وهتستلمها هتلاقيها شهادة كارتون لونها أزرق ومكتوب فيها بيناتك راجعها كويس قبل ما تمشي وصورها كذا نسخة.

المرحلة الثانية: مديرية القوى العاملة

- هتروح مديرية القوى العاملة اللي أنت تابع لها ومعاك النص التاني من الأوراق وهيكون مكتوب فيها عنوان المديرية اللي هتروحها و طبعاً هيكون معاك الأوراق التاليه ( أصل وصور شهادة النجاح + استمارة البطاقة بعد ما تملي بيناتها )
- هتروح لموظف وتقوله أنا عايز أثبت الوظيفة في البطاقة، هياخد منك النص التاني من الأوراق + صورة الشهادة وهيطلب منك تدفع وصلات بـ 35 جنية وتصورهم 
- لازم الموظف يختم لك على استمارة البطاقة في مكان الوظيفة، من غير الختم مش هتتسجل في البطاقة الجديدة
- بعدها تاخد كل الأوراق دي وتروح لموظف تاني هو المسئول عن أستخراج الكارنية هياخدهم منك ويقولك تعالى بعد ساعة او تاني يوم تاخد الكارنية.
- بعد ما تاخد الكارنية اتأكد أن البيانات مظبوطة وبعدها صوره كذا نسخة
- هتروح السجل المدني أو القسم اللي أنت تابع له ومعاك الأتي:

1- استمارة البطاقة مختومة من القوى عاملة زي ما قولت فوق
2-أصل الكارنية + صورة 
3-أصل الشهادة + صورة
4-أصل البطاقة القديمة + صورة
5-أصل الوصلات اللي دفعتها في القوى العاملة + صورة
6-أصل شهادة الميلاد + صورة

- هتسلم الموظف الأستمارة بالصور و هتسلمه الأصل للأطلاع فقط (ما تخليش الموظف ياخد أي أصل) و بعد كده هتتصور وبعد 20 يوم هتاخد البطاقه بالوظيفة الجديدة وبعد كده بتروح الجوازات لأثبات المهنه ع الباسبور ツ