طريقة الحصول على الإقامة السياحية فى تركيا


طريقة الحصول على الإقامة السياحية فى تركيا خطوة بخطوة

لو انت مصري ومقيم فى دولة من دول الخليج
ممكن نقدملك على الفيزا من عندك وهـــنــا كل التفاصيل عنها 
----------------------------------------------------------------
نقوم بتوفير كل شيء بخصوص تركيا ( الفيزا - الإستقبال من المطار - حجز الفنادق - برامج للرحلات اليومية  - حجز الطيران الدولي والداخلي - تأجير سيارات خاصة - تأجير شقق مفروشة فى أغلب المدن)

متاح أيضا التقديم على الإقامة فى تركيا من خلال شركة سافر من هنــــا
والتقديم على دراسة اللغة فى تركيا من هنـــا
كل التفاصيل الخاصة بالتقديم على الفيزا والموافقة الأمنية من مصر من هنــــا

هنتكلم بالتفصيل دلوقتي ازاي تعمل إقامة سياحية بنفسك ومن غير اي مشاكل بإذن الله , خد نفس عميق , واستعد لقراءة المقال الطويل فوق العادة ده ، الاول نجاوب علي بعض الأسئلة:
- يعني ايه اقامة سياحي ؟ - يعني بتكون مقيم في تركيا بشكل رسمي لمدة سنة او سنتين – قابلة للتجديد – وليك الحق في الدخول والخروج من تركيا اي عدد من المرات , ومن غير ما تحتاج تاشيرة او تصريح امني.
- طب يحق ليا الشغل لو معايا الإقامة السياحي ؟  - القانون بيقول لأ , بس الواقع ان محدش بيسأل , وأغلب المصريين اللي شغالين هنا معاهم إقامة سياحي
- طب سهل اجددها ؟ ولمدة كام سنة ؟  - ايوة ممكن تجددها كل سنة , ولعدد مفتوح من السنوات
- هعرف اخد الجنسية بالاقامة السياحي ؟  - لأ , الاقامة السياحي مش بتدي الجنسية ابدا
- هل هيتم الغاء الاقامة السياحية قريب ؟  - فيه فعلا اخبار بتقول ان الاتحاد الاوروبي بيضغط علي تركيا لالغاء الاقامة السياحية اللي مش موجودة في اي بلد اوروبية . بس حتي الان مفيش اي اخبار مؤكدة
- طب فيه انواع اقامات تانية غير السياحي ؟ 
- ايوة فيه انواع تانية زي :
- الاقامة الإنسانية : 
- إقامة المستثمر : 
- إقامة العمل : 
- إقامة الطالب
الإقامة السياحية اللي هنتكلم عنها دلوقتي
================================
اهم شرط لعمل الإقامة السياحية , انك تقدم عليها قبل ما يتم كسر تاشيرتك , يعني لو تاشيرتك لمدة شهر , فلازم تقدم عليها
قبل مرور 30 يوم من دخولك تركيا , احيانا بيكون فيه فترة سماح بس محدش يضمن
وطبعا متجيش في اخر يوم من ال30 يوم وتقدم , لان احيانا بيكون الموقع مهنج او بطئ فمتلحقش , ياريت تقدم من تاني يوم تيجي فيه تركيا علي طول
الورق المطلوب لعمل الإقامة السياحية هو :
1- جواز سفر صالح لمدة سنة علي الأقل
2- تأمين صحي 
3- صور شخصية
4- ورقة اللقب من السفارة
5- ورقة الحساب البنكي (ممكن لا يتم طلبها )
6- عقد الإيجار ( ممكن لا يتم طلبه )
7- ورقة العدلية ( ممكن لا يتم طلبه )
================================
1 - يكون معاك جواز السفر الخاص بيك , وتصوره , وتصور الصفحة بتاعت الفيزا , ولو كان ختم دخول تركيا مش في نفس صفحة الفيزا تصور ختم الدخول
ولو انت جاي بفيزا الكترونية , لازم تجيبها معاك يوم المقابلة
2 - بالنسبة للتأمين الصحي , فبيتم عمله من إحدي شركات التامين الصحي في تركيا , وبيتم تحديد السعر بناء علي السن , وديه اسعار التامين الصحي في 2014 , و هتلاقي اسعار 2016 قريبة منها من هنــــا
وممكن تعمله لوحدك عن طريق انك تروح لاي مكتب محترم في اكسراي او الفاتح وتعمله فورا
والتامين الصحي بيتيح لك مجموعة من المستشفيات تكشف فيها باسعار مخفضة , وكمان بيعمل تخفيض في حالة وجود اي عملية جراحية لا قدر الله
و زمان كان ممكن تعمل معاد للمقابلة من غير ما تعمل التامين الصحي , لكن حاليا لازم تعمل التامين الصحي قبل ما تاخد الموعد

3 - الصور الشخصية , مطلوب 5 صور شخصية بخلفية بيضاء , ولو رحت اي استوديو في منطقة الفاتح وقلتله "فوتو ايكاميت" هيفهمك 
4 - ورقة اللقب , هي عبارة عن ورقة بتطلع من القنصلية المصرية في اسطنبول اللي في منطقة بيبيك , وبيكون فيها اسمك بالكامل واسم العائلة
حضرتك بتروح القنصلية اللي في المكان ده من هنــــا
عن طريق انك تاخد الترام اتجاه كاباتاش وتركب 
22 , 22RE , 25E
او من تقسيم وتركب 
40 , 40T , 42T
وتنزل محطة بيبيك , وترجع بضهرك 50 متر وهتلاقي القنصلية علي البوسفور
روح اي يوم من الاتنين للجمعة , من الساعة 10 الصبح ل 2 الضهر , متقفش علي الشباك , قول انك مصري وعايز ورقة اللقب , وجوة القنصلية قدم عليها ب 70 او 80 ليرة والمفروض تستلمها بعدها بيوم
5 - بالنسبة لورقة الحساب البنكي
اولا هي مش إجباري في الاقامة , يعني ممكن ميطلبهاش وفيه ناس عملت الاقامة ومسالهاش عليها , وفيه ناس تانية راحو وسالها عليها
فرأيي انك متعملهاش في الاول , وروح الراندفو من غيرها , ولو سالك عليها هيحددلك مهلة اسبوعين عشان تعرف تعملها
كان قبل كدة في النظام القديم بيقبلوا ورقة من الصرافة انك غيرت 6000 دولار , بس دلوقتي مبقوش يقبلوها لما عرفوا ان اي حد بيضربها بسهولة
طب ورقة الحساب البنكي اعملها ازاي ؟
اولا اعمل حساب بنكي في بنك كويت ترك , زي ما البوست ده موضح من هنـــــا
بعدها شوف حد يثق فيك , يروح معاك البنك ويحطلك المبلغ في الحساب بتعاك , وتطلع الورقة في نفس اللحظة , قول للموظف في البنك عايز
Hesap Ekstresi Ikamet
هيفهمك , وهيديلك ورقة باجمالي الحساب بتاعك
لو ملقيتش اي حد يثق فيك ويديلك الفلوس , شوف بقي لو فيه مكاتب او حد يعملهالك وطبعا هياخد منك رسوم
6- عقد الإيجار برضه من الحاجات اللي كانت مطلوبة في النظام القديم , ودلوقتي ممكن متتطلبش , وبيكون عن طريق ان يكون اسم صاحب الإقامة مكتوب في عقد شقة رسمي , ويكون العقد متوثق في النوتير , واحيانا الموظف في الاقامة بيطلب الطابو ( اللي هو عقد ملكية الراجل التركي اللي مأجرلك الشقة ) عشان يتاكد ان العقد حقيقي
ولو عايز تعمل لمراتك اقامة , يبقي من الاول اكتب اسمك واسم المدام في عقد الايجار , عشان تقدي هي تستخدمه في الاقامة بسهولة
برضه لو العقد مش متاح معاك , روح من غيره , ولو سأل عليه حاول تعمله لو شوف لو فيه حد بيعملهولك بالفلوس
7 - ورقة العدلية , هي ورقة بتجبيها من المحكمة التركية في باكيركوي , هتروح عند محطة مترو باكركوي , تطلع من المترو تمشي شمال في شمال حتلاقي مبنى كبير واضح أدخل وامشي مع السور متدخلش المبنى اللي في وشك لحد آخر السور وحتدخل شمال عند السجل , قدم الباسبور بتاعك وقول عايز :
adeli secil belgisi
وهتاخدها وانت واقف , وبرضه نأكد ان الورقة ديه مش بتطلب دايما
اما لو عندك اولاد تحت الـ 18 سنة , فهات شهادات ميلادهم , وترجمها ووثقها , وخليها معاك في المقابلة ,وطبعا جواز سفر الاب والام وصورهم , وتكون جايب صور للأولاد , ومش مطلوب ليهم تامين صحي او ورقة عدلية او ورقة لقب او شهادة بنك
كمان لو هتعمل اقامة او هتجددها وبيطلبوا منهم شهادة الميلاد مصدق عليها من القنصلية والقائم مقام (Kaymakam)
من فترة بدأت إدارة الهجرة (Göç İdaresi) تطلب من الناس اللي بتجدد إقامة أطفالهم يصدقوا شهادة الميلاد من القنصلية المصرية وبعدها من القائم مقام (Kaymakam) بدل ما كان زمان بنترجم الشهادة وبنختمها من النوتر. وعليه حبيت ألخص لكم الخطوات اللي هتعملوها بدل ما تضيعوا وقت وفلوس أنتم أولى بيها:
1. لازم تكون شهادة الميلاد مصدق عليها من الخارجية المصرية (لو مش مصدقة هتكون مضطر تبعت تجيب واحدة من مصر مصدقة)
2. هتروح القنصلية المصرية في (Bebek) وبتطلب ترجمة وتصديق شهادة الميلاد وبتدفع 170 ليرة
3. القنصلية بتديك وصل بتستلم بيه الأصل والنسخة المترجمة تاني يوم بعد الظهر (الساعة 3 غالبا)
4. هتاخد النسخة المترجمة المصدق عليها من القنصلية وتروح لقائم مقام فرع بيشكتاش (Beşiktaş Kaymakamliği) تصدقها من هناك والخطوة دي مهمة جدا لأننا رحنا لفروع تانية ولم يتعرفوا على ختم القنصلية الا فرع بيشكتاش.
5. هتروح لإدارة الهجرة وتقدم شهادة الميلاد المترجمة والمصدق عليها من قائم مقام بيشكتاش
وبكدة أكون اختصرت عليكم لف ودوران كتير عملناه أنا وبعض الأصدقاء علشان نعرف نعمل ايه
================================
كدة احنا اتكلمنا عن الورق المطلوب , وهنبدأ دلوقتي في الكلام التفصيلي عن عمل الاقامة
زي ما قلنا , عشان الاقامة تكون مظبوطة , لازم تقدم عليها قبل ما يمر 30 يوم من دخولك تركيا , والتقديم بيكون عن طريقة موقعهم الرسمي ده من هنــــا
اول ما تدخل هتلاقي زرار علي اليمين الخاص بتجديد الإقامة , وعلي الشمال الخاص بالإقامة الجديدة , اختار اللي علي الشمال , زي الصورة ديه من هنــــا
بعدها هيجيلك تلات اختيارات , عايز تعمل معاد جديد , ولا تكمل بيانات معادك القديم , ولا تشوف نتيجة معادك الي عملته , لو هتعمل جديد , اختار الزرار اللي علي الشمال خالص زي الصورة ديه من هنــــا
هتظهر الصورة ديه من هنــــا
واللي منها هتبدا تدخل شوية بيانات ليك , عشان تكون زي الصورة ديه من هنــــا 
والبيلنات بالترتيب ( من فوق علي الشمال لتحت )
- الاسم
- اللقب
- تاريخ الميلاد ( الشهر الاول بعدها اليوم بعدها السنة )
- اسم الاب
- اسم الام
- النوع
بعدها نروح للقايمة علي اليمين 
- الرقم القومي ( سيبك منها )
- الجنسية 
- رقم الباسبور
- وسيلة التواصل (تليفون او ايميل )
- الايميل ( لازم يكون شغال )
- الموبايل
بعدها تحت علي الشمال اكتب الحروف اللي هتظهر واختار "سيف"
هتظهر شاشة ان افتح الايميل بتاعك اللي دخلته من شوية , افتح الايميل هتلاقي جالك ايميل من الامنيات زي ده من هنــــ
ودوس علي اللينك الازرق اللي عندك , وهتظهر الشاشة ديه من هنــــا

و هيطلب منك كود التاكيد , دخل الرقم اللي من 6 ارقام اللي جالك في الايميل ودوس علي "كونتينيو"
هتظهر الشاشة ديه من هنــــا
واللي فيها بتحدد نوع الاقامة اللي عايزها , لو اقامة طالب اختار الزرار اللي فوق علي اليمين , لو اقامة سياحية او اقامة عقار اختار الزرار اللي تحت علي اليمين اللي مكتوب عليه 
Application for short term residence permit
هتظهرلك الشاشة ديه من هنــــا
واللي هتلاقي فيها البيانات اللي انت دخلتها من شوية , و كقاعدة عامة , اي خانة باللون الاحمر يبقي لازم تدخلها , اي حاجة باللون الاسود مش لازم تعملها
و علي اليمين اعمل ابلود لصورتك , ودوس نيكستهتلاقي الشاشة دي من هنـــــا
هتلاقي برضه شاشة فيها بعض بياناتك اللي كنت دخلتها قبل كدة , ولو حاجة ناقصة دخلها ,
ودوس نيكست , هتظهر الشاشة دي من هنــــا
واللي فيها بيانات الباسبور , اختار اول خانة فوق علي الشمال "اورديناري باسبورت" , تحتها علي طول اكتب تاريخ اصدار الباسبور , وتحتها تاريخ انتهاءه
بعد كدة فوق علي اليمين اكتب رقم الباسبور من غير حرف ال"ايه" , وتحتها اختار "ايجيبت" و تحتها اكتب وزارة الداخلية بالانجليزي زي ما مكتوبة كدة في الصورة
دوس نيكست , هتظهر الشاشة ديه من هنــــا
هنا هيسالك انت بتعمل الراندفو لنفسك ولا لحد تاني , لو لنفسك اختار اول واحدة و دوس نيكست
هتظهر الشاشة ديه من هنــــا
واللي فيها المفروض تكتب عنوانك في مصر , وزي ماهو باين في الصورة , تكتب اسم البلد والمحافظة والرقم البريدي والعنوان و التليفون في مصر (اكتب اي رقم ) , والايميل . ودوس نيكست
هتظهر الشاشة ديه من هنــــا
هنا هتكتب عنوانك في تركيا , من فوق علي الشمال تختار الولاية ( اسطنبول ) بعدها تختار البلدية , بعدها المحلية , بعدها اسم الشارع , ورقم العمارةساعتها هيظهر العنوان بالكامل بالشكل ده من هنـــــا
وفوق علي اليمين تكتب رقمك في تركيا , والايميل
وحاول يكون العنوان مظبوط بقدر الامكان , لتجنب اي تساؤل في المقابلة
ولو انت قاعد في سكن شبابي و هتعمل عقد الايجار من مكتب , فالاول خليه يعملك عقد الايجار , وامسك العنوان و اكتبه هنا

دوس نيكست هتظهر الشاشة ديه من هنــــا
هنا هتكتب المهنة اللي بتشتغلها في مصر , وممكن تكتب اي كلام زي ما في الصورة هنا
دوس نيكست . و هتظهر الشاشة ديه من هنـــــا
هنا هتكتب المستوي التعليمي الخاص بيك و برضة ممكن تكتب اي حاجة زي ما في الصورة او حتي تسيبها فاضية

دوس نيكست . و هتظهر الشاشة ديه من هنــــا
هنا المفروض تكتب دخلك كام و مصدره , وممكن تكتب ارقام زي الموجودة في الصورة

دوس نيكست . و هتظهر الشاشة ديه من هنــــا
هنا تدخل بيانات التامين الصحي الخاصة بيك , ولو مكنتش عملته يفضل تعمله الاول بعدها تعمل الموعد
ولو صاحب الراندفو اقل من 18 سنة او فوق ال 65 ساعتها مش لازم تامين صحي , , وتختار من القايمة اللي فوق علي الشمال 
Under 18 or over 65 years
اما لو عمرك بين 18 و 65 تختار فوق علي الشمال "بريفت هيلث انشورانس" زي ما في الصورة
وتحتها علي طول تكتب تاريخ انتهاء التامين الصحي
فوق علي اليمين تختار اسم الشركة
و تحتها تكتب رقم بوليصة التامين

دوس نيكست . و هتظهر الشاشة ديه من هنــــا
و ديه جموعة اسئلة اعمل عليها كلها علامة صح من غير تفكير
وباقي الاسئلة من هنــــا 
و الاسئلة الاربعة في الاخر سيبهم من غير علامة صح
دوس نيكست . و هتظهر الشاشة ديه من هنـــا
و هنا تختار غرض الاقامة
لو اقامة سياحية تختار من اول قايمة العنصر ده 
Those who will stay for tourism
وتحتها تكتب
Living in turkey
علي الشمال تختار مدة الاقامة المطلوبة , تكتب 1 , وتختار سنة 
, وبعدها تكتب بداية المدة ( واللي هتكون من دخولك تركيا ) , و نهاية المدة ( بعد سنة )
و تعمل علامة صح في المربع تحت علي الشمال
اما لو هتعمل اقامة عقار , فهتعمل نفس الحاجات هي هي , لكن اول قايمة تختار منها
Those who have immovable property in turkey
زي الصورة ديه من هنــــا
دوس نيكست . و هتظهر الشاشة ديه من هنــــا
ولو لقيت فيها ان الخانة التانية منورة , معني كدة ان بياناتك كاملة , دوس عليها عشان تختار معاد (لو لقيت الخانة التانية مش منورة معني كدة ان فيه بيانات ناقصة )
هتظهر الشاشة ديه من هنــــا
اختار اول واحدة ودوس ريسيوم , هتظهر الشاشة ديه من هنـــا
هنا تختار الامنيات اللي هتعمل فيها الموعد
و خد بالك , بشكل عام امنيات الفاتح بتكون اكترهم ازدحام وبالتالي مواعيدهم متاخرة جدا , وامنيات بينديك ( قبل الاخيرة ) بتبقي رايقة الي حد ما , بس لازم يكون عقد ايجارك من هناكاول ما تختار امنيات هتطلعلك الشاشة ديه من هنـــا
واللي بيقولك ان هيهر ليك الموعد و مش هينفع تغيره , دوس علي الزرار تحت علي اليمينهتطلع الشاشة ديه من هنــــاواللي بيقولك ان معادك يوم كذا الساعة كذا , ومتنساش تدوس علي الزرار تحت علي اليمين عشان تطلعلك الاستمارة اللي بالشكل ده من هنــــا
واللي المفروض هتطبعها و تروح بيها
============================================
طيب انا كدة حجزت الموعد , اعمل ايه بقي يوم المقابلة
هنا اخونا المهندس محمد سعودي حكالنا بالتفصيل تعمل ايه يوم المقابلة :
الخطوة اﻷخيرة فى تقديم أوراق الإقامة 
الراندفو . الموعد . المقابلة. اﻷوراق المطلوبة
- ازاى توصل ؟
بالمترو تنزل أمنيات فاتح Emniyet Fatih وتخرج تعدى الطريق وتمشى 3 دقايق هتلاقيها على اليمين.
لو جاى باتوبيس رايح فى اتجاه يوسف باشا اكسراي زى مثلا 76D
ممكن تنزل أى محطة من دول (فينديكازى - هاسكي - يوسف باشا - اكسراي ) هاسكي وفينديكازى أقرب عشان متمشيش كتير إنما أى واحدة منهم هتوصلك ان شاء الله.
بعد متنزل من الاتوبيس هتعدى الناحية التانية من الطريق بعد الترام والاتجاه العكسي وتدخل أى شارع قصادك تمشى حوالى 200 متر لحد الشارع ميخلص بحيث تروح فى الاتجاه التانى خالص بتاع المنطقة دى اللى هو لو مشيت يمينه طوالى هتلاقي اكسراي. امشى انت بقه شمال طوالى حوالى 7 دقايق كمان هتلاقى المبنى على اليمين (هتعدى الطريق بردو) جنب بوليس استنبول
واو انت فى اكسراى نفس الكلام. هتخلى محطة مترو اكسراى فى ظهرك وتمشى طوالى على الرصيف اليمين. لحد متوصل.
ممكن وانت ماشى تسأل اى حد لو توهت او للتأكيد. قوله استنبول بوليس أو اقامات (بالعربى والتركي زي بعض) . لو متعرفش تركي مش هتفهم منه أى حاجة طبعا بس هيشاورلك على الاتجاه على الأقل
- اﻷوراق المطلوبة:
1-ابليكيشن التقديم اللى انت عملته على اﻻنترنت ممضي
2- أصل و صورة من الباسبور والفيزا اللى جوه الباسبور
3- أصل شهادة اللقب 
4- أصل و صورة من عقد الإيجار 
5- أصل السيجورتا (بياخد الأصل مش فاهم ليه )
6 - 4 صور شخصية
كان معايا الحساب البنكى (مصري لأنى معرفتش اعمل تركي) وشهادة السابقة بتاعت العدلية. تعمدت انى أخفيهم واشوف هيحتاجهم ولا لأ واقوله مش معايا وكده واشوف هيعمل ايه عشان الناس اللى مش معاها وفعلا مطلبهمش.
يعنى ولا مطلوب حساب بنكي وﻻ ورقة العدلية دي. استمارة التقديم بتقول انه ممكن يسألك على الحساب البنكى أو يسألك هتعيش ازاى فى البلد. كمان معرفش الوضع ايه لو انت أسرة مش فرد. وانا أول مرة وليس تجديد.
اجمالا التجربة فى المكان كانت سيئة.
انا كان موعدى فى الاستمارة الساعة 4 . انا قلت تركيا وبتاع أكيد نظام هروح فى موعدى هلاقى الموظف مستنينى 
المهم روحت انا الساعة 2 طلع الموعد اللى فى الورقة ملوش أى لزمة. اللى بيجي الأول بياخد دوره ويدخل.
الصدمة التانية انى قلت أكيد عاملين حسابهم والموظفين بتكلموا عربى وانجليزى وتركي أو على الأقل انجليزى وتركى . مع الأسف تركي فقط.
المكان مش منظم. أو شبه منظم. بس أسوأ مصلحة حكومية دخلتها فى تركيا حتى الآن( لا اقارن بمصر - اقارن بباقى تركيا). ماشيين طوابير. ومفيش نظام انك تاخد الرقم وتقعد تستنى دورك كما تعودنا فى تركيا. الموظف بينادي على اللى عليه الدور وبينادي فى سره . اضطريت كل شوية اقوم من الكرسي واروح جنب الباب أشوف ناقص اد إيه. المفروض انهم بينادوا بس معرفش مسمعتش حد.
فالمهم انت أول متدخل المبنى بتطلع الدور التانى تروح على مكتب الاستقبال أول متدخل هيديك رقم مثلا
D-32 -16
ده معناه انك هتروح على غرفة رقم D على الموظف رقم 32 جواها بيكونوا كاتبين الرقم على شاشة الكمبيوتر بتاعته بشكل واضح كبير. وانت رقم 16 عنده. هتروح تديله الورق وتستنبط من الورق اللى قدامه قدامك حوالى كام واحد أو تشوف آخر واحد كان رقمه كام وتنتظر وتتابع على الباب.
قعدت ساعتين فى الحوار ده. وكان موظف بارد وبطيء مع أنه شاب و كمان بيستخدموا انترنت اكسبلورر يعنى برود موظف وبطء وبرود براوزر. لحين الموظف مخلص كانت الساعة بقت 4 نزلت لقيت الخزينة قفلت اضطريت اجى تاني يوم مرة تانية. وصلت 12:15 كانت الخزنة فى البريك وقفت طابور تانى رخم على الخزنة لحد مدفعت خدت بتاع ساعة كمان فى الطابور ده.
فاللى يروح يحاول ميروحش وقت البريك. يعنى تكون هناك على 9 او 1:30 لو مش هتقدر بدرى
المفروض قاللى ادفع 55 ليرة. الراجل بتاع الخزنة قاللى 85 وكتبلى ايصال فعلا بالمبلغ ده (ضرب فى جيبه 1.5 ليره عشان الوصل كان مكتوب فيه 83 وكسر)
المهم بعد متدفع وتاخد الايصال هتطلع بيه تانى مع الورق بتاعك كامل اللى المفروض الموظف راجعه ودبسه واداهولك وتديه تانى للموظف وتنتظر شوية لو في ايده حد يخلصه ويناديلك. هتقعد معاه 5 دقايق كمان او 10 هيطبعلك الاستمارة ويحط عليها صورتك ويديهالك والحمد لله . اوعا تمشي لسه 
المفاجاة التالتة اللى فكرتنى بأم الدنيا انك لازم تاخد الورقة دى تختمها من مكتب تانى
مكتب صغير كده على جنب. الصراحة مخدتش فى ولا دقيقة وريته الورقة ختمها ختمين على الصورة وعلى امضاء الموظف التانى. أخدت الورقة ومشيت الحمد لله . المفروض بعد كام يوم(معرفش كام بالظبط) بروح استلم كارت الاقامة الأحمر ده لما اعرف هقولكم.
ملحوظة : ممكن يكون الطوابير والتأخير سوء حظ بالنسبة ليا أو سوء توقيت. ممكن ميحصلش ده فى حالتك.
================================
وهنا اخونا ياسر فتحي كتب برضه هو عمل ايه بالظبط
ده اللي حصل معايا روحت بدري 8 ونص والطابور كان طوييييل وصلت تقريبا قرب 11 همه بينظموا الدخول مجموعات علشان الضغط جوه يفضل تروح بدري ولما تدخل تطلع الدور التاني واحد حيديك ورقة في حرف A او B او C او D وفيها رقم المكتب اللي انت حتدخل تديله الورق ممكن مثلا يكون D29 الحرف مكتوب على باب الغرفة من بره والمكاتب جوه عليها الارقام 
الموظف حيراجع الورق ان كله تمام ويقولك انزل الدور الاول ادفع الفلوس تقريبا حيعملوا في حدود 77 ليرة ونص تقريبا او ازيد شوية بعد الدفع حتاخد الايصال وترجع تاني لنفس الموظف علشان يستلم الورق ويدبس فيهم الايصال ( حاول تاخد صورة الايصال بالموبايل وانت واقف قبل ما تسلمها ) المفروض الموظف حيصور الايصال ويديك الصورة ( خد انت الصورة احتياطي بالموبايل علشان لو نسى او طنش او الماكينة مش شغاله ) ومعاها ورقة تسمحلك بالسفر لكن بحد اقصى اسبوعين وبعد اسبوعين الورقة دي مالهاش قيمة 
المفروض الموظف حياخد تليفونك ويتاكد من العنوان اللي انت كاتبه في العقد لان بيقولوا الاقامة حتتبعت على العنوان ده
بس كده تقريبا ده اللي حصل معايا يوم الجمعة اللي فاتت وقدمت انا وزوجتي واولادي
أخيرا بقي يوم المقابلة لو كل حاجة تمام , هيديلك وصل ان الدنيا تمام , وان الاقامة هتتبعتلك بالطرد علي عنوان , وتابع معاهم ومع شركة البي تي تي , عشان ممكن ينسوك
ولو فيه اي حاجة ناقصة هيقولك ارجع وهات كذا كذا وتعالي خلال اسبوعين مثلا
بس , خلصنا الحمد لله
المصدر : هشام عاصم

اعرف أيضا عن الخدمات التي تقدمها شركة سافر 
كل التفاصيل الخاصة بالتقديم على الفيزا من مصر هنــــا
لو انت مصري ومقيم فى دولة من دول الخليج
ممكن نقدملك على الفيزا من عندك و
هـــنــا كل التفاصيل عنها 
------------------------------------------------------------
نقوم بتوفير كل شيء بخصوص تركيا ( 
الفيزا - الإستقبال من المطار - حجز الفنادق- الإقامة القانونية - تأسيس الشركات -برامج للرحلات اليومية  - حجز الطيران الدولي والداخلي - تأجير سيارات خاصة - تأجير شقق مفروشة فى أغلب المدن -تنظيم المعسكرات الرياضية)
* تواصل معنا على رقم الشركة.
للحجز أو الاستفسار عن أي تفاصيل ممكن تكلمنا على رقم الشركة
مكتب مصر: 00201018647306 _ 00201279309900 
​​​​ 
ايميل: 
[email protected]
 مكتب تركيا: 00905445019185 (
WhatsApp)
ايميل: 
[email protected]   
مواعيد العمل: من السبت للخميس من الساعة 8 صباحاً لـ 6 مساءًا.
تابع كل عروض سافر من 
هـنـا​​​​​​

إسطنبول فيزا مجانا إقامة الخلاصة طيارة سفر سفارة تركيا سياحة سافر أوروبا الاقامة في تركيا اقامة تركيا خدمات اونلاين فيزا الكترونية online Visa الإستثمار فى تركيا رحلات تركيا الرحلات في تركيا رحلات إسطنبول