رجعوني من المطار يا بيه


رجعوني من المطار يا بيه

موضوع جديد ومهم جداً جداً جداً ويمكن محدش اتكلم فيه قبل كده وهو ان فى ناس بتروح المطار ومعاها كل حاجه ويرجعوها تانى لسبب معين هو / هي مكنوش يعرفوه، تعالوا نعرف اهم الأسباب اللى الناس بترجع عشانها من المطار علشان نتجنبها:
انا كتبت أهم 11 نقطة فيهم أغلب المشاكل اللى بتحصل وتحلها إزاي:

1- جواز السفر: طبعا الكارثة الكبري انك توصل المطار وتكتشف ان الباسبور فى البيت، وحصلت مع ناس كتير اعرفهم شخصياً، يبقي اهم حاجه تتأكد منها وانت طالع من البيت ان معاك الباسبور بتاعك، وتبص فيه كويس احسن يكون بتاع اخوك او اختك.
2- الفيزا : اغلب الدول دلوقتي ليها فيزا وخصوصا للمصرين، وكل دولة ليها طريقة معينة فى التقديم على الفيزا، لازم تتاكد ان معاك فيزا الدولة اللى مسافرلها، وتكون من جهة موثوقة لأن احياناً بيكون فى فيز مضروبة.
3- مدة سريان الباسبور: لازم تتأكد ان الباسبور صالح على الأقل 6 شهور من تاريخ السفر، وتتاكد من بيانات الفيزا تكون نفس بيانات الباسبور لأن ممكن يكون فى غلط ، فى الأول والأخر اللى بيكتب الفيزا انسان وممكن يغلط، اتأكد بنفسك من كل حاجه.
4- الفيزا تكون سارية: يعني ايه؟ اي فيزا بيكون ليها تاريخ بداية ونهاية من يوم كذا ليوم كذا، يعني انا ممكن أكون استلمت فيزا فرنسا النهارده وهي لسه مش سارية؟ اه ممكن طبعا... ممكن تكون الفيزا سارية بعد 10 ايام او بعد 15 يوم مثلا، مهم جدا جدا تتاكد ان الفيزا سارية من يوم كذا ليوم كذا وده مكتوب فى الفيزا نفسها ويكون السفر والعودة خلال مدة سريان الفيزا.
5- السفر والعودة بشكل قانوني: إزاي يعني السفر والعودة بشكل قانوني، ركز معايا كويس جدا
الفيزا بتكون فيها كذا جزء:
A- جزء خاص بمدة الفيزا ككل من يوم كذا ليوم كذا (مثلا من 1 يناير 2017 إلى 30 مارس 2017) ودي اتكلمنا فيها فى النقطة اللى فاتت
B- جزء خاص بعدد ايام الإقامة المسموح بيها (لازم تتأكد من عدد ايام الإقامة خلال مدة الفيزا ودي بردو مكتوبة فى الفيزا) يعني انت ممكن يكون معاك فيزا سارية 3 شهور مثلا، بس عدد ايام الاقامة 30 يوم فقط، يبقي لازم تذكرة الذهاب والعودة تكون أقل أو   تساوي عدد أيام الإقامة.
C- دخول مرة واحدة او دخول متعدد، لازم تتاكد ان الفيزا مكتوب عليها تقدر تدخل بيها مرة واحدة او اتنين او متعددة الدخول.
6- تصريح السفر من التجنيد: النقطة دي خاصة بالشباب اللى فى سن التجنيد، تصريح السفر فيه كذا نقطة:
A- لو مكتوب فى الباسبور يسمح بالسفر حتي تاريخ كذا (مثلا يسمح بالسفر حتي 1 إبريل 2017) يبقي تقدر تسافر قبل 1 إبريل 2017 من غير تصريح سفر
B- لو مكتوب فى باسبورك "فى سن التجنيد" يبقي لازم تعمل تصريح سفر من الجيش قبل السفر،
ازاي أعمل تصريح السفر؟ بتاخد الباسبور + شهادة قيد من الجامعة لو انت طالب، أو شهادة التأجيل المؤقت لو أخدت تأجيل 3 او 5 سنين من الجيش + الفيزا بتاعت السفر + تذاكر الطيران + البطاقة الشخصية + تصور كل الأوراق اللى فاتت دي وتروح بالأصل والصور منطقة التجنيد اللى انت تابع ليها وبتعمل تصريح سفر للدولة اللى مسافر ليها وبتستلمة فى نفس اليوم تقريباً، بس لازم تروح بدري يعني 8 الصبح تكون هناك.
C- لو مكتوب فى الباسبور "في سن التجنيد" وانت معاك شهادة بالإعفاء النهائي بس لسه مغيرتش الباسبور واثبت فيه انك غير مطلوب، يبقي تصور الشهادة دي وتاخدها معاك فى المطار ومش مطلوب منك تصريح سفر نهائياً.
D- لو مكتوب فى الباسبور "في سن التجنيد" وانت دخلت الجيش، هتفضل لغاية متكمل 30 سنة لازم تعمل تصريح سفر فى كل مرة تسافر فيها، علشان تعمل تصريح السفر هتاخد كل الأوراق اللى فاتت + شاهدة تأدية الخدمة العسكرية ، ربنا يعينك
E- لو مكتوب فى باسبورك "غير مطلوب" يبقي مش محتاج تصريح سفر من التجنيد نهائياً، وتقدر تسافر بالباسبور فقط.
*ملحوظة لو انت اخدت تأجيل علشان "وحيد عيلة" لازم تاخد معاك قيد عائلي وانت رايح تعمل تصريح السفر + باقي الأوراق.
* ملحوظة مهمة جدا للطلبة: لازم تسافر فى الأجازات ( نص السنة او أخر السنة) علشان تعرف تطلع تصريح السفر، غير كده مش بيطلع.
* ملحوظة ممكن تعمل تصريح سفر لعدة سفريات وفى الحالة صوّرة علشان بياخدوا منه صورة فى المطار، اتأكد من البيانات اللى مكتوبة فى التصريح وراجعها كويس (تأكد من أسمك والمدة المصرح السفر فيها وجهة السفر)
* ملحوظة بالنسبة للبنات لا ينطبق عليهم اي شئ بخصوص تصريح السفر من التجنيد.
ده تقريبا كل ما يخص تصريح السفر من التجنيد، لازم تكون عارف موقفك ايه من التجنيد علشان مترجعش تاني من المطار بسببه.
7- التصريح الأمني: أو الموافقة الأمنية، إيه الموافقة الأمنية دي كمان؟ للمصريين فقط
دي حاجه كده استغفر الله العظيم مش مفهومه وكل يوم فيها قوانين وقرارات جديدة، انا وليد مؤسس شركة سافر هقولك اخر معلومات عندي بتاريخ 25 فبراير 2017
1- فى دول كتير ليها تصريح أمني وأشهر الدول هي ( تركيا – الأردن – لبنان – السودان – تايلند – ماليزيا – كوريا الجنوبية – أندونيسيا – جنوب افريقيا
هتكلم بالتفصيل عن تركيا علشان هي اكتر دولة احنا بنسافر ليها:
انا عملتها اكتر من مرة وأخر مرة كانت بتاريخ 25 فبراير 2017 ، وكل مرة بيكون فى قانون جديد، وأخر حاجة موجوده دلوقتي:
- لو انت / انتي سنك من 18 لـ 40 سنة لازم تعمل موافقة أمنية علشان تسافر تركيا بغض النظر عن مهنتك.
خطوات استخراج الموافقة الأمنية:
- لو انت عندك مهنة فى الباسبور بتعمل فيزا سياحة أو زيارة أو عمل وبعد كده تروح مجمع التحرير وتصور الفيزا والباسبور وبتستلمها بعد 3 ايام عمل وتكلفتها نص جنيه.
- لو انت مكتوب عندك فى الباسبور طالب أو حاصل على (بكالوريوس او ليسانس أو دكتوراه) لازم تكون نوع الفيزا زيارة مش سياحة علشان تعمل الموافقة الأمنية، ممكن تتواصل معانا واحنا نعملك الزيارة.
- الموافقة الأمنية صلاحيتها شهرين من تاريخ الإستلام، لازم تتأكد من البيانات بنفسك.
- العنوان :القاهرة – ميدان التحرير -  مجمع التحرير – الدور الأول – مكتب ظابط الإتصال رقم 15
* ملحوظة: لازم تتأكد بنفسك من مجمع التحرير قبل السفر بخصوص الموافقة الأمنية لأن كل يوم فى قوانين جديدة ممكن تعرف كل التفاصيل عن شروط السفر إلى تركيا للمصريين
8- فيزا من المطار: بعض الدول تقدر تاخد الفيزا بتاعتها عند الوصول من المطار هناك، بس لازم تتأكد انك معاك حجز فندق وحجز طيران ذهاب وعودة وخصوصا لو انت رايح سياحة، وفى شروط تانية لازم تتاكد منها من موقع السفارة الرسمي.
9- مشاكل خطوط الطيران: في بعض خطوط الطيران مش بتسمحلك بالسفر عليها إلا لو انت معاك الفيزا بتاعت البلد اللى انت هتدخلها الأول!! يعني ايه الكلام اللى مش مفهوم ده؟
A- يعني انا مرة كنت مسافر من شرم الشيخ لميلان فى إيطاليا وكان معايا فيزا من فرنسا ورفضوا يطلعوني الطيارة علشان الفيزا من فرنسا وانا هدخل إيطاليا على خطوط طيرانMeridiana Airline  الإيطالية. مع اني قبلها سافرت من الغردقة لسويسرا على خطوط طيران Easyjet  البريطانية وبردو معايا فيزا فرنسا!!! حاجه كده مش مفهومة خالص.
B – في بعض الفيز لازم تحجز على خطوط طيران معينة!! يعني مثلا لو عامل فيزا اونلاين لتركيا لازم تحجز على (Turkish Airlines, Pegasus Airlines, Onur Air or Egypt Air.) ودي مكتوبة فى الفيزا نفسها.
10 - الترانزيت : في بعض الدول علشان تعمل ترانزيت فيها لازم يكون معاك فيزا ترانزيت ودي لازم تتاكد منها من خطوط الطيران قبل السفر ( أشهر مثال على كدة "لندن" يعني لو انت مسافر ألمانيا وعندك ترانزيت فى لندن مش هتعرف تسافر غير لو معاك فيزا إنجلترا.
11- التوقيت: تكاد تكون نقطة لا تذكر بس فى ناس كتير بتغلط فى مواعيد الطيران ( توقيت الطيران بيكون بنظام الـ 24 ساعة يعني لو الطيران الساعة 06:00 يبقي 6 الصبح، ولو الطيران الساعة 18:00 يبقي 6 المغرب لازم تاخد بالك كويس قوي من النقطة دي، وكمان فى جزء تانى متعلق بالنقطة دي وهو ان التوقيت بيكون على أساس كل بلد يعني الوقت المكتوب فى التذكرة ده وقت الدولة اللى انت مسافرلها.

الباسبور المصري
لو الدولة اللى انت مسافرلها ملهاش فيزا ولا موافقة أمنية ولا أي حاجة، ده يبقي حاجة عظيمة جدا وتحس قد ايه انت مهم وتقدر تاخد باسبورك العظيم وتطلع على المطار وتحجز وتسافر وتستمتع.
كده تقدر تسافر وانت مطمن ورحلة سعيدة

اعرف أيضا عن الخدمات التي تقدمها شركة سافر 
كل التفاصيل الخاصة بالتقديم على الفيزا من مصر هنــــا
لو انت مصري ومقيم فى دولة من دول الخليج
ممكن نقدملك على الفيزا من عندك و
هـــنــا كل التفاصيل عنها 
-------------------------------------------------------------
نقوم بتوفير كل شيء بخصوص تركيا ( 
الفيزا - الإستقبال من المطار - حجز الفنادق- الإقامة القانونية - تأسيس الشركات -برامج للرحلات اليومية  - حجز الطيران الدولي والداخلي - تأجير سيارات خاصة - تأجير شقق مفروشة فى أغلب المدن -تنظيم المعسكرات الرياضية)
* تواصل معنا على رقم الشركة.
للحجز أو الاستفسار عن أي تفاصيل ممكن تكلمنا على رقم الشركة
مكتب مصر: 00201018647306 _ 00201279309900 
​​​​ 
ايميل: 
[email protected]
 مكتب تركيا: 00905445019185 (
WhatsApp)
ايميل: 
[email protected]   
مواعيد العمل: من السبت للخميس من الساعة 8 صباحاً لـ 6 مساءًا.
تابع كل عروض سافر من 
هـنـا​​​​​​

جورجيا مجانا إقامة مصر بريطانيا امريكا مضيفة طيران مطار مسافرين إسطنبول المطار طيارة الخلاصة لبنان لندن سافر أوروبا سياحة تركيا advice ADVICES نصائح سافر safer ADVICES safer